Diaspor Gənclərinin VI Yay Düşərgəsində “Konstitusiya və Suverenlik” mövzusunda panel təşkil olunub
Xankəndidə keçirilən Diaspor Gənclərinin VI Yay Düşərgəsinin ilk paneli “Konstitusiya və Suverenlik” mövzusuna həsr olunub.
Qarabağ Universitetinin Humanitar və sosial elmlər fakültəsinin dekanı Elmar Mustafayevin moderatorluğu ilə baş tutan panelin qonaqları Milli Məclisin Hüquq siyasəti və dövlət quruculuğu komitəsinin sədri, millət vəkili Əli Hüseynli, Konstitusiya Məhkəməsinin hakimi Rəşid Rzayev və Avropa İnsan Hüquqları Məhkəməsinin hakimi Lətif Hüseynov olub.
Azərbaycan Respublikası Prezidentinin Sərəncamına əsasən ölkəmizdə 2025-ci ilin “Konstitusiya və Suverenlik İli” elan edildiyi və Vl düşərgənin də bu əlamətdar hadisəyə həsr olunduğu diqqətə çatdırılıb. 2025-ci ilin həm də Azərbaycan Respublikası Konstitusiyasının qəbulunun 30, Vətən müharibəsində şanlı qələbəmizin 5 ilinin tamam olduğu qeyd edilib.
Millət vəkili Əli Hüseynli Azərbaycan Respublikasının Konstitusiyasının ölkəmizin hüquqi və siyasi əsaslarını müəyyən edən ali sənəd olduğunu vurğulayaraq, müstəqilliyimizin qorunmasında suverenlik anlayışının əsas yer tutduğunu qeyd edib. O, diaspor gənclərini hüquqi biliklərini artırmağa və Azərbaycanın milli maraqlarını beynəlxalq müstəvidə müdafiə etməyə çağırıb.
Konstitusiya Məhkəməsinin hakimi Rəşid Rzayev Azərbaycan Konstitusiyasının insan hüquqlarının təminatçısı olduğunu bildirib. Hüquqi dövlətin əsaslarının və konstitusiyaya sadiqliyin xaricdə yaşayan soydaşlarımız tərəfindən də qavranmasının vacibliyini qeyd edib və gəncləri hüquqi düşüncəyə yiyələnməyi məsləhət görüb.
Avropa İnsan Hüquqları Məhkəməsinin hakimi Lətif Hüseynov isə çıxışında Azərbaycanın beynəlxalq hüquq sisteminə inteqrasiyası və insan hüquqları sahəsində əldə etdiyi uğurlardan danışıb. O, diaspor gənclərinin Azərbaycan həqiqətlərinin və dövlətçilik dəyərlərinin dünya ictimaiyyətinə çatdırılmasında mühüm rol oynaya biləcəyini vurğulayıb.
Panel interaktiv müzakirələrlə davam edib. Diaspor gəncləri öz suallarını panel iştirakçılarına ünvanlayaraq hüquqi sistem, vətəndaşlıq məsuliyyəti, dövlətçilik dəyərləri və milli suverenliyin qorunması ilə bağlı geniş fikir mübadiləsi aparıblar.
Qeyd edək ki, avqustun 3-dən 9-dək davam edəcək Diaspor Gənclərinin VI Yay Düşərgəsi Azərbaycan Respublikası Diasporla İş üzrə Dövlət Komitəsinin və Heydər Əliyev Fondunun birgə təşkilatçılığı ilə gerçəkləşdirilir. Diaspor Gənclərinin VI Yay Düşərgəsində dünyanın 61 ölkəsindən 128 gənc iştirak edir. Bundan əvvəlki düşərgələr Şəki, Şamaxı, Şuşa, Naxçıvan və Laçın şəhərlərində baş tutub, düşərgələrə hər il 60-dan çox ölkədən ümumilikdə 700-dən çox gənc qatılıb.
