QAXDA BAYRAQ MEYDANINDA NOVRUZ BAYRAMI QEYD OLUNUB.
Müstəqillik qazanılandan bu günə kimi Qax rayonunda belə geniş tərkibdə Novruz Bayramı tədbiri keçirilməmişdi desək yanılmarıq. Möhtəşəm Bayraq meydanına toplaşan qaxlılar ilk dəfə idi ki, belə geniş tərkibdə bayram şənliyini qeyd etdiklərini bildiriblər. Məkan böyük, geniş ərazi olduğuna görə rayon camaatı tədbirdə ürəklə iştirak ediblər.
Diaspor. infonun Qax bürosu xəbər verir ki,
Xalqımızın ən qədim adət-ənənələrindən, milli birlik və həmrəylik rəmzi olan Novruz bayramı Qaxda böyük ruh yüksəkliyi ilə qeyd edilib. Baharın gəlişi münasibətilə Bayraq meydanında ümumrayon bayram şənliyi keçirilib.
Rayon rəhbərliyi, qonaqlar, rayon ziyalıları, ümumiyyətlə şənlik iştirakçıları əvvəlcə ayrı-ayrı idarə-müəssisə kollektivlərinin təşkil etdikləri səməni və xonçalarla bəzədilmiş bayram süfrələri, milli mətbəx nümunələri ilə tanış olub, el sənətkarlarının əl işlərinə baxıblar.
Meydanda həmçinin idmançıların nümunəvi çıxışları təqdim olunub. Pəhləvanın güc nümayişləri bayrama rəng qatıb.
Tədbirdə Qax Rayon İcra Hakimiyyətinin başçısı Elvin Paşayev çıxış edərək, Şəhid ailələri başda olmaqla bütün tədbir iştirakçılarını bayram münasibətilə təbrik edib, qədim adət-ənənələrimizdən olan Novruzun xalqımız tərəfindən həmişə böyük sevinc və coşqu ilə qarşılandığını bildirib. 
Vurğulayıb ki, artıq xalqımız Novruz bayramını ikiqat sevinc hissi, Qələbə əhval-ruhiyyəsi ilə qeyd edir. İndi xalqımız Novruz tonqalının Xankəndi şəhərində, Şuşada, Xocalıda, Laçında, işğaldan azad olunmuş digər şəhər və rayonlarımızda alovlandırılmasından böyük qürur hissi keçirir.
Daha sonra tədbirdə Dədə Qorqudun Novruz təbrikindən sonra meydanda qurulan bayram tonqalı qalanıb. Tonqalı Vətən müharibəsi şəhidlərinin övladları alovlandırıblar.
Bayram şənliyində respublikanın tanınmış incəsənət nümayəndələri, rayonun musiqi və rəqs kollektivləri rəngarəng konsert proqramı ilə çıxış edib, idmançılar, balaca gimnastlar, pəhləvanlar öz məharətlərini göstəriblər. Novruzun personajları olan Kosa və Keçəl məzəli zarafatları ilə bayram iştirakçılarına xoş ovqat bəxş ediblər.
Diaspor.info
Qax bürosu
