Azərbaycan yenicə müstəqilliyini əldə etmişdir ki, xain qonşuları tərəfindən təcavüzlə rastlaşdı. Həmin vaxtı, yəni “Birinci Qarabağ” müharibəsi başlayan zaman, Azərbaycan nəinki müharibəyə hazır deyildi, hətta Milli ordusu belə tam formalaşmamışdı. Düzdür xain qonşumuz olan ermənilərin də, milli ordusu yox səviyyəsində idi, ancaq Azərbaycandan fərqli olaraq onlara havadarları tərəfindən xeyli silah-sursat hədiyyə olunduğuna görə, müharibənin sonu iyirmi faiz torpaqlarımızın itirilməsi ilə yekunlaşdı. Aydın məsələdir ki, itirilmiş torpaqlarımız, xalqımızın başına gətirilən soyqırımlarla heç bir qeyrətli Azərbaycan oğulu razılaşa bilməzdi. Həmin dövrdə igid, qeyrətli oğullarımız əliyalın olsalar da, yağı düşmənin hücumundan qorxub qaçmadılar, qəhrəmancasına döyüşərək, vətən yolunda şəhid oldular. Belə igid, qəhrəman oğullarımızdan biri də, Zaqatala şəhər sakini Şixəmirov Fikrət Şahid oğludur.
Şəhid haqqında daha çox məlumat əldə etmək məqsədilə Zaqatala şəhərinə yollandıq.
Şəhidimizin qardaşı Şəfayət Şixəmirovla görüşüb, xeyli söhbətləşdik:
Şixəmirov Fikrət Şahid oğlu 1975-ci il 5 mayda Zaqatala şəhərində doğulub 1982-ci ildə şəhər 5 saylı məktəbin 1-ci sinifənə gedib. 1990-cı ildə 8 illiyi bitirib. Daha sonra sürücülük məktəbini bitirib. 1993-cü il oktyabrın 19-da həqiqi hərbi xidmətə çağırılıb. 1994-cü il fevralın 14-də Murovdağ ətrafında gedən döyüşlərdə şəhid olub. Nəşi Murovun güzgü dağında qalıb. Şəhidin nəşini gətirə bilmədik, ona görə də, itgin kimi qəbul edirik.
Ailədə 4 uşaq olmuşuq, 2 oğlan 2 qız. Fikrət çox mərd oğlan idi, heç nədən qorxmaz idi.
Dostluğa çox möhkəm olub.
Qardaşının həyat yoldaşı Fatma: Qonşu kimi çox mehriban olub. Babaları əslən Qaxın Ləkit kəndindəndir. Onlar yay tətilinə kəndə gedirdilər. Fikrətin dostu yüksəklikdə şəhid olub.O, deyib ki, mən qalxıram dostumun meyidini gətirməyə, gedib bir daha geri gəlməyib. Orada şəhid olub.
Atası Şahid də, rəhmətə gedib. Anası Gülgəz xanım isə oğlunun şəhid xəbərini eşidəndən 10 gün sonra rəhmətə gedib.
İkinci Qarabağ savaşı, “Vətən Müharibəsi” zamanı bütün şəhidlərimiz kimi Fikrət Şixəmirovun da,
qisası alındı, bu gün onun da, ruhu şaddır. Belə ki, uğrunda öldüyü torpaqlarda artıq Azərbaycan əsgəri dayanır.
ALLAH BÜTÜN ŞƏHİDLƏRİMİZƏ RƏHMƏT ELƏSİN!
Əlmaniz Ələkbərli
Azərbaycan Jurnalistlər Və
Yazıçılar Birliyinin Üzvü.
