Həmsədrlər Xankəndinə səfər edərsə... - ŞƏRH ÖZƏL
"ATƏT-in Minsk qrupunun həmsədrləri regiona növbəti səfərə gəlir. Bu səfərdə əsas məqsəd Qarabağın statusunu müzakirə etmək və ermənilərə müstəqillik məsələsini gündəliyə çıxarmaqdan ibarətdir. Azərbaycan demək olar ki, prosesləri öz lehinə dəyişib və Minsk qrupunun fəaliyyətinə ehtiyac görməməlidir. Bu məsələ Bakı-Ankara və Moskva formatında davam edir. Qarabağdakı, Rusiyanın sülhməramlı qüvvələrinin təsir zonasında proseslər həmsədrlərlə deyil, Rusiya ilə müzakirə edilməlidir. Ümumiyyətlə, artıq heç bir həll variantları yoxdur və buna da ehtiyac qalmayıb. Müharibəyə qədər "Madrid prinsipləri" işğal olunmuş rayonların boşaldılması qarşılığında Qarabağa müəyən status verilməsi idi. Azərbaycan bu məsələni özü həll edib. Ermənistan rəhbərliyi və həmsədrlər yenidən "Madrid prinsiplərinə" qayıtmaq üçün çalışır". Bunu DİASPOR.İNFO -ya açıqlamasında politoloq Məhəmməd Əsədullazadə deyib. Ekspertin sözlərinə görə, ümumiyyətlə Minsk qrupu gəlib nəyi həll etməlidir?! "Həmsədrlər gəlib ermənilərə deyəcək ki, Azərbaycanın tərkibinə qatılın və dinc yaşayın?! Qəti surətdə belə bir təklif onlara olunmayacaq. Azərbaycana gəlib deyəcəklər ki, ordakı ermənilərə status verin. Başqa alternativləri yoxdur. Onsuzda Azərbaycan ermənilərə öz ərazisində daima status verməyə hazır olub. Amma həmsədrlər belə bir status deyil, münaqişənin davam etməsi, ermənilərin Azərbaycana qarşı körüklənməsinə rəvac verməyə gəlirlər". Politoloq söyləyib ki, regionda ABŞ və Fransa Qarabağ məsələsini yenidən gündəliyə çıxarmaqla, prosesdən kənarda qalmamaq siyasətini ortaya qoyurlar: "Rusiyada həmsədrlərin regiona gəlib, status məsələsini qaldırmaqlarında maraqlıdır. Ona görə də 50 mindən artıq ermənini Qarabağda yerləşdirməklə, məhz gələcək perspektivdə referenduma hazırlaşır. Həmsədrlər məhz danışıqlar aparmaqla siyasi zəmin hazırlamaq planına malikdir". M.Əsədullazadə vurğulayıb ki, Minsk qrupunun fəaliyyəti Azərbaycan və Ermənistan arasında gələcək perspektivdə yeni münaqişəyə yol açmaq, sülh və təhlükəsizliyi təhdid etməkdir: "Ona görə də birtərəfli şəkildə bu formatdan çıxmaq lazımdır. Qeyd edim ki, həmsədrlər Xankəndinə gedəcəklərsə, burada separtizmə dəstək kimi qiymətləndirilməlidir. İlk növbədə, Xankəndinə səfəri Ermənistan tərəfdən Laçın dəhlizindən edəcəklərsə, bu, münaqişənin davam etdiyi mesajını verməkdir. İqtidar həmsədrlərin Ermənistan ərazisindən Azərbaycan ərazisinə belə səfərini qanunsuz elan etməlidir. ABŞ və Fransa çalışır ki, Türkiyəni prosesdən kənarlaşdırsın. Azərbaycana qarşı bundan sonra da siyasi təzyiqlərin olacağı gözlənilir. Amma bu siyasi təzyiqlər nəticə verməyəcək. Birmənalı şəkildə bu proses Azərbaycanın suverenliyinə təhdiddir. Ona görə də Laçın Dəhlizində nə qədər ki, nəzarətimiz yoxdursa, bu problemlər davam edəcək. Buna son vermək üçün Türkiyə ilə birgə çalışmaq, ABŞ və Fransaya artıq bu məsələ Azərbaycanın daxili işidir mesajını vermək lazımdır".
Müəllif: Aysel Məmmədova