ŞƏHİD VÜSAL MƏMMƏDOV QAYDASIZ DÖYÜŞ ÜZRƏ AVRASIYA ÇEMPİONU İDİ.
Zaqatala rayonu Lahıc kəndi Azərbaycan Ordusuna qəhrəmanlıq nümunəsi olan əsgər və zabitlər bəxş edib. Təkcə XTQ komandiri İsmayıl Səmədov və Vüsal Məmmədovu nümunə göstərsək, yetərincədir. Uşaqlıqdan idmana marağı olan Şəhidimiz Vüsal Nəsib oğlu Məmmədov orta məktəbi bitirdikdən sonra Bakı şəhərinə işləməyə gedib. Özəl şirkətlərdə işləyən Vüsal uşaqlıq arzularını reallaşdırmaq üçün, paytaxtda professional idmanla məşğul olmağa başlayıb. Qaydasız döyüş növü üzrə 65 kq çəkidə rəqib tanımıyan Vüsal Məmmədov 2016-cı ildə həqiqi-hərbi xidmətə gedib. Vətənə olan kişilik borcunu, cəbhə bölgəsində, layiqincə ödəyən şəhid qəhrəmanımız evə döndükdən sonra, idmanla daha aktiv məşğul olmağa başlayır.
Xocalı soyqırımına həsr olunmuş yarışda da, birinci yeri əldən verməyən Vüsal Məmmədov, sonralar sözügedən idman növü üzrə “Avrasiya” çempionu da, olub. Həqiqi-hərbi xidmətdə hərbin sirrlərinə dərindən yiyələnməsi “Vətən Müharibəsi” zamanı onun karına gəldi. XTQ kimi hərbi xidmət etmək istəməsi Vüsalın çoxdankı arzusu idi. “Vətən Müharibəsi” başlanan kimi digər qeyrətli Azərbaycan oğulları kimi, Vüsal da, Vətənə xidmətə yola düşdü. 27 sentyabrdan başlanan döyüş yolunda Vüsal XTQ ilə birgə irəlidə oldu. Vüsal peşəkar idmançı olduğuna görə ən ağır döyüşlərdə iştirak edib.
Əsasən snayperçi kimi döyüş yolunu Cəbrayıl, Xocavənd, Füzuli rayonlarında daha da, ağır keçirən şəhidimizin qismətinə ölüm yazılmamışdır. Hadrutun azad olunması üçün şiddətli döyüşlərə qatılan Vüsal iki dəfə pusquya düşür, hər ikisində atılan əl qumbarasından yaralanıb, ancaq döyüşdən çıxmayaraq, sona qədər vuruşub. Yaralı əsgərimiz üçüncü dəfə oktyabırın 10-da, düşdüyü pusquda Şəhidlik zirvəsinə ucalıb.
Bu gün Lahıc kənd tam orta məktəbinin 6-cı sinifi və Zaqatala şəhərində yerləşən 152 saylı Ağdamın köçkün məktəbinin birinci sinifi Şəhidimizin adını daşıyır.
Vüsal Məmmədovun atası Nəsib kişi oğlu ilə ata-bala olmaqla yanaşı həm də, dost olduğunu xüsusi vurğuladı. Vüsalın böyük qardaşı Daşqın da, hərbiçidir. Onun oğlu Vüsalın adını daşıyır.
Anası Səbinə xanım da, çətinliklə də, olsa video-müsahibə Verdi. Səbinə xanım deyir ki, oğlumla qürur duyuram, ancaq o, mənim hər şeyim idi. Dərd ortağım, dostum-qardaşım və qeyrətli oğlum idi.
Vüsalın döyüşə, hətta əsgər getməzdən əvvəl yaratdığı instaqram səhifəsinə nəzər salarkən, baxıb görürsən ki, səhifədə daha çox vətənpərvərlik mövzusuna yer verilib. Şəhidlər, Mübariz İbrahimov, Azərbaycan bayrağı, hikmətli sözlər və s. hər biri Vətənə həsr olunub. Deməli, Vüsal vətənpərvər oğul olub.
Vüsal Nəsib oğlu Məmmədovu oxucularımızla yaxından tanış etmək məqsədilə onun haqqındakı məlumatları olduğu kimi yazırıq:
Vüsal Nəsib oğlu Məmmədov 1998-ci il 15 martda Zaqatala rayonunun Lahıc kəndində anadan olub. 2004-2015-ci illərdə Q.Qocayev adına Lahıc kənd tam orta məktəbində təhsil alıb.
Vüsal Məmmədov 2016-cı ildə müddətli həqiqi hərbi xidmətə çağırılıb. 2016-2017-ci illərdə Azərbaycan Silahlı Qüvvələrinin cəbhə bölgəsində yerləşən “N” saylı hərbi hissəsində xidmət edib.
Azərbaycan Silahlı Qüvvələrinin əsgəri olan Vüsal Məmmədov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Cəbrayı, Xocavənd və Füzulinin azadlığı uğrunda gedən döyüşlərdə iştirak edib.
Vüsal Məmmədov oktyabrın 10-də Füzuli döyüşləri zamanı şəhid olub. 14 oktyabrda Zaqatala rayonunun Lahıc kəndində torpağa tapşırılıb. Subay idi.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti İlham Əliyevin 2020-ci il 15 dekabr tarixli Sərəncamı ilə Vüsal Məmmədov ölümündən sonra "Vətən uğrunda" medalı ilə təltif edilib. 24-12-2020-ci il Cəbrayılın azad olunmasına görə, 24-06-2021-ci ildə Cəsur Döyüşçü medalı və 5-11-2021-ci ildə isə Xocavəndin azad olunmasına görə medalları ilə təltif edilib.
Şəhid Vüsal Məmmədovun martın 15-də doğum günüdür, Cənnətdəki doğum günün mübarək-Şəhidim.
Əlmaniz Ələkbərli
Azərbaycan Jurnalistlər Və
Yazıçılar Birliyinin Üzvü.
620
