ŞƏHİD FƏQAN MƏMMƏDOV ÖLÜMÜN ÜZÜNƏ DİK BAXAN VƏ ŞANLI TARİX YAZAN QƏHRƏMANLARDANDIR.
ÖZÜNÜ ƏL QUMBARASININ ÜSTÜNƏ ATARAQ, DOSTLARINI ÖLÜMDƏN QURTARIB, ÖZÜ İSƏ ŞƏHİDLİK ZİRVƏSİNƏ UCALAN ŞİR ÜRƏKLİ FƏQAN MƏMMƏDOV MÜASİR MÜHARİBƏLƏRDƏ EDİLƏN QƏHRƏMANLIQ NÜMUNƏSİDİR.
İkinci Qarabağ savaşı “Vətən Müharibəsi” başlanan kimi Azərbaycanın bütün igid-qeyrətli oğulları ayağa qalxdılar. Ürəyi Vətən eşqi ilə döyünən gənclərimiz, döyüşlərə qatılmaq üçün səfərbərlik idarələrinin qarşısında növbəyə dayandılar. Bəlkə də, dünyada ilk dövlət idi ki, müharibə başlayan vaxtı fərarilik ümumiyyətlə olmadı. Xalqımızın igid, cəsur oğlanları tarix yazmaq üçün döyüşə getməyə tələsirdilər.
Belə qeyrətli Azərbaycan oğlanlarından biri də, Fəqan Vahid oğlu Məmmədov idi. O Fəqan ki, ürəyi idmanla, incəsənətlə döyünürdü. Kəntdə yaşamasına baxmayaraq, həddən artıq dünyagörüşlü bir gənc idi, dünya ədəbiyyatının vurğunu olub. Ana və bacılarına kitab hədiyyə etməyi sevən, yaraşıqlı bir gənc idi.
Anasına tez-tez kitab hədiyyə edərək:”Ana boş vaxtlarında mütləq oxuyarsan”, -deyərdi. Bəli, Fəqan da, tarix yazmaq üçün tələsirdi, baxmayaraq ki, nişanlı idi, toy üçün hazırlaşırdı. Fəqan müddətli həqiqi-hərbi xidmətdə olduğuna görə, başqa gənclərdən fərqli olaraq, cəbhənin bir addımlığında idi. O, şanlı tarix yazanlardan olmaq üçün, bu şərəfli yolda dünyada əvəzi olmayan və qiyməti bilinməyən canına qıydı.
Bütün həyatını, öz gələcək ailə həyatını, sevgisini, şirin canını Ana qədər sevdiyi Vətənə fəda etdi.
Qəhrəmanlıq nümunəsi olan, Şəhid Məmmədov Fəqan Vahid oğlu
27 iyun 1998-ci ildə Zaqatala rayonu Suvagil kəndində anadan olub.
2015-ci ildə Suvagil kənd 2 saylı tam orta məktəbini bitirib. Azərbaycan Dövlət Mədəniyyət və İncəsənət Universitetinin “Kinoşünaslıq” ixtisasının “Kino və Televiziya” fakültəsini bitirib.
8 iyul 2019-cu ildə müddətli həqiqi-hərbi xidmətə yola düşüb. Vətən müharibəsi başlayan vaxtı, onun evə gəlməsinə üç ay qalmışdı. Hərbi xidmətini Goranboy, Ağdam rayonları istiqamətində edib. Müharibə başlayan vaxtı isə, Ağdamın Qaradağlı kəndində xidmət edib.
Şəhid atası Vahidin üç övladı olub, Fəqan, Nurcan və Naida.
Suvagil kəndinin əksəriyyət kişiləri kimi Vahid də, rusiyaya qazanc arxasınca gedənlərdən olub. Ailəsini mövsümi işlərdə qazandığı pullarla saxlayıb. Fəqan şəhid olduğu gün də, Vahid Rusiyada olub.
Şəhid Fəqan Məmmədov Vahidin yeganə oğul övladı idi, o, futbolu çox sevirdi. Bu sevgi Universitetlər arası yarışlara qatılmağa qədər gəlib çatmışdır.
Sağlığında buna qarşı olmasına baxmayaraq, kiçik bacısı Naida hazırda, Fəqanın xətrinə futbolla ciddi məşğul olur.
Fəqan sözün hər mənasında əsil incəsənət adamı idi. O, ssenari yazmağı da, ustalıqla bacarırdı.
Anası Surət Məmmədova yeganə oğlu Fəqanı çox əzizləyərmiş:”özümdən asılı deyil, nədənsə onu həddindən çox qorumağa çalışırdım. Uşaq vaxtlarında təkbaşına heç yerə qoymazdım, sanki onu cavan itirəcəyimi bilirdim və çox qoruyurdum. Tək oğul övladı olduğuna görə diqqətim daima üzərindəydi.
Demək olar ki, böyüyənə qədər öz yanımda yatızdırardım, düşünürdüm ki, ona soyuq olar. Biraz çox sadəlövh, səmimi, dostcanlı idi, sinifdə uşaqlar şuluq edən kimi Fəqan irəli çıxaraq, bütün günahları öz üzərinə götürərdi. Müəllimləri artıq bilirdilər ki, Fəqan yoldaşlarını xilas etmək, müdafiə etmək üçün belə bir addım atır.
Hərbi xidmətdə olduğu müddətdə də, bütün fikiri qalmışdı ailəsinin yanında. Tez-tez soruşardı ki, bacım imtahanı necə verdi, testin cavabları çıxmadı? Deyirdi ki, bacım hökmən əczaçı olacaqdır, odur ki, qəbulun təsdiqi haqqında sms gələn kimi mənə təcili xəbər edin. Bakıda ona kirayə ev də, tapmışam, dindar bir nənənin yanında qalacaqdır.
Fəqanın bacısı onun istədiyi kimi Əczaçılığa qəbul olundu. Bilmirəm nədənsə sevinə bilmirdik. Ana ürəyidir, təhlükəni hiss edirdim, sonra bildik ki, sms gələn günüsü şiddətli döyüşlər gedirmiş.
Mən hələ müharibə başlamazdan əvvəl xeyli dəhşətli yuxular görürdüm. Yuxumda daha çox haqq dünyasının insanları, rəhmətə gedənlərlə görüşüb, danışardım. Günlərin birində yuxumda gördüm ki, üzərində xeyli gül-çiçək olan bir qəbir var. Kimsə mənə deyirdi ki, bu qəbir Şəhid Fəqan Məmmədovundur.
Həmin vaxtı heç kimin ağlına belə gəlməzdi ki, tezliklə müharibə olacaqdır. Hamı elə başa düşmüşdü ki, mənim psixoloji durumum pozulub, düşünürdülər ki, ağlımı itirmişəm. Qızımın qəbul sms-i gələn günü isə heç unuda bilmirəm. Nədənsə bu xoş hadisəyə sevinə bilmədik, mənim ürəyimə nəsə pis şeyin olacağı dammışdı. Sən demə həmin günü Fəqan ölüm-dirim mübarizəsində olub. Mən sanki xəstəlik tapmışdım, daxilimdə hər yerim ağrayırdı.
Fəqanın şəhid xəbərini eşidən kimi bütün xəstəliklərim itdi, artıq heç yerim ağrımadı.
Fəqan bizimlə sonuncu dəfə 25 sentyabrda telefonla danışdı. Bir gün sonra, dostu Ramin Məcidova zəng edib və deyib ki, hər şey ola bilər. Sən anamla bacılarımın yanında ol, onlara ürək-dirək ver, dayaq ol. Ramin hazırda magistr təhsili almaq üçün Finlandiyadadır.
Ümumiyyətlə Fəqan və dostları çox savadlı idilər, onlar təhsil almağı, bu yöndə daha çox inkişaf etməyi qarşılarına məqsəd qoymuşdular.
Fəqan özü kompyuter proqramlarını çox yaxşı bilirdi, əlindən gəlməyən iş yox idi. Rəsm çəkir, nəyisə düzəldər, dizayn verərdi. Allah onu incəsənət üçün mənə vermişdi, ancaq mən onu axıra kimi qoruya bilmədim.
Mənim heç kimim yoxdur, ata-ana, bacı-qardaş, o bunu bilirdi. Deyirdi ki, hərbi xidmətimi başa vurub gələn kimi, atamı işləməyə qoymayacağam. Nişanlamışdım oğlumu, deyirdim ki, artıq ali təhsilli oğlansan, gəl toyunu da, edim. O, da, deyirdi ki, kişilik məktəbini, hərbi xidmətimi də, qurtarım sonra edərik.
Günlərin birində yuxumda gördüm Fəqan mənə deyir ki, ana sənin adını heç bilirsən hara yazdırmışam?! Deyirdi ki, çox yuxarıya yazdırmışam, sən bilsən ki, hara yazdırmışam, lap çox yuxarıdadır....”
Bacısı Naida da, qardaşı haqqında ağızdolusu danışdı:” qardaşımız çox mehriban və ciddi idi, o bilirdi ki, mən ona baxaraq, futbola həvəslənmişəm.
Yaxşı oynadığımı bilir və mənimlə fəxr edirdi, ancaq özümə deyirdi ki, futbol oynamaq qız işi deyil, yəni məşğul olma. Bu gün mən sırf onun xatirəsi üçün futbolla ciddi məşğul oluram, çünki qardaşım futbolu sevirdi.
Qardaşım qəhrəman idi, Vətən yolunda Şəhid olub. Necə ki, uşaqlıqdan dostcanlı olub, müharibədə də, eyni xasiyyətdə olub. Döyüş yoldaşları Fəqanın şəhid olma səhnəsini belə xatırlayırlar. Dedilər ki, biz düşməni sıxışdırdıq və onlar təslim olmaq üçün ağ bayraq qaldırdılar.
Biz onlara yaxınlaşan zaman hiyləgər erməni öz xain hərəkətlərini işə salaraq, əl qumbarasını üzərimizə atdılar. Fəqan bizləri kənara itəliyərək, özünü qumbaranın üzərinə atdı və özü şəhidlik zirvəsinə ucaldı, bizi isə xilas etdi. Biz tarixdə oxumuşuq ki, belə qəhrəman Azərbaycan oğulları olublar, bu gün həmin qəhrəmanlıq edən oğullardan biri də, məhz mənim qardaşımdır. Mən qardaşımla fəxr edir, qürur duyuram.
O, təkcə bizim deyil, bütün Azərbaycan xalqının qəhrəman oğludur. Onun etdiyi bu cəsarət, qorxmazlıq və Vətən sevgisi isə, bütün dünyaya nümayiş olunacaq səviyyədə bir qəhrəmanlıqdır.”
Fəqan Vahid oğlu Məmmədov əslində sözün hər mənasında Xalq qəhrəmanıdır. Öz canına qıyaraq, dostlarını xilas etməsi isə, hələ illərlə haqqında danışılacaq və dastanlar yazılacaq bir qəhrəmanlıq nümunəsidir.
[/center]Fəqan Məmmədov 6 oktyabr 2020-ci ildə qəhrəmancasına şəhid olub, 8-də isə, Suvagil kənd qəbirstanlığında dəfn olunub.
Azərbaycan Respublikasının Prezidenti İlham Əliyevin sərəncamı ilə 15-12-2020-ci il “Vətən Uğrunda” və 24-06-2021-ci il “Ağdamın alınmasına görə” medalı ilə təltif olunub.
Əlmaniz Ələkbərli
Azərbaycan Jurnalistlər Birliyinin
Və Yazıçılar Birliyinin Üzvü.
635
