ŞƏHİD TEYMUR YUNUSOVUN RUHU ŞADDIR, ONUN UĞRUNDA CANINDAN KEÇDİYİ TORPAQLARIMIZ AZADDIR.
Azərbaycan yenicə müstəqilliyini əldə etmişdi ki, xain qonşuları tərəfindən təcavüzə qaldı. Ermənilər fürsət gözləyən tülkü kimi Azərbaycanın zəif olmasından istifadə edərək, öz havadarlarının dəstəyi ilə xalqımıza qarşı soyqırımlar törətməyə başladılar. Bütün cəbhə boyu qeyri-bərabər döyüşlərdə xalqımızın qəhrəman oğulları vətəni müdafiə etmək üçün silaha sarıldılar. Belə igidlərdən biri də, Yunusov Teymur Maqsud oğludur:
Yunusov Teymur Maqsud oğlu 1974-cü ildə Bakı şəhərində anadan olmuşdur. Lahıc kənd orta məktəbini bitirdikdən sonra, kənddə fermada çalışmışdır. 08.12.1992-ci ildə müddətli həqiqi hərbi xidmətə çağırılıb. Şəmkir rayonunda qısa müddətli hərbi hazırlıq keçdikdən sonra Qarabağa, Ağdərəyə aparılmışdır. Onun döyüş yolu Murov dağa kimi uzanmış və digər rayonlarda da, davam etmişdir. 14.01.1994-cü ildə Füzuli rayonu uğrunda gedən döyüşlərdə şəhid olmuşdur.
Zaqatala rayonu Lahıc kəndində dəfn olunub.
Teymur Yunusov haqqında daha ətraflı məlumat toplamaq üçün Zaqatala rayonu Lahıc kəndinə yollandıq. Şəhidimiz haqqqında anası Gülbənzər xanımla xeyli söhbətləşdik: ikisi qız, üçü oğlan olmaqla beş övladım vardı. Ailəmizin böyük övladı, şəhid Yunusov Teymur Maqsud oğlu 1974-cü ildə Bakı şəhərində anadan olmuşdur. Bir müddət sonra biz Zaqatala rayonu Lahıc kəndinə köçdük. 1991-ci ildə Lahıc kənd orta məktəbini bitirmişdir. Teymur hərbiçi olmaq istəyirdi. Zaqatala hərbi komissarlığı tərəfindən Bakı şəhərində yerləşən hərbi məktəbə göndərildi. Öz arzusu ilə getmişdi ancaq arzusuna çata bilmədi, hərbiçi olmaq ona qismət olmadı. Bir müddət kalxozda çalışdı. 1992-ci il dekabrın 8-də Milli Ordu siralarına çağırıldı. Əvvəlcə Şəmkir rayonunda hərbi hissələrin birində əsgərlik etməyə başladı. Qısa müddət hazırlıq keçdikdən sonra, Ağdərə rayonuna, döyüş bölgəsinə göndərilib.
Onun döyüş yolu Kəlbəcərdə, Murov dağında davam edib. Murov dağında baş verən döyüşlərdə şaxtaya düşüb, bir müddət xəstə olduğu üçün müalicə də, alıb. 1994-cü il yanvar ayının 14-də Füzuli bölgəsində gedən döyüşlərdə düşmən tərəfindən atılan güllə nəticəsində şəhid olmuşdur. 1994-cü il yanvarın 16-da Zaqatala rayonu Lahıc kənd qəbirstanlığında dəfn olunub.
İkinci Qarabağ savaşının Zəfərlə yekunlaşması, qarabağ torpaqlarının azad olunması sayəsində Teymurun da, ruhu şaddır. Bu gün onun da, şəhid olduğu Azərbaycan torpaqlarında artıq erməni əsgəri deyil, müzəffər Azərbaycan əsgəri dayanır. 1993-cü ildə Nazirlər Kabinetinin qərarına əsasən Zaqatala rayon 2 saylı Yuxarı Tala kənd orta məktəbi şəhid Telman Yunusovun adına əbədiləşdirilmişdir. Şəhidin atası Cuma Yunusov Azərbaycan dövlətinə ,dövlət başçısına oğlunun adının əbədiləşdirdiyinə görə xüsusi minnətdarlığını bildir.
ALLAH BÜTÜN ŞƏHİDLƏRİMİZƏ RƏHMƏT ELƏSİN!
Əlmaniz Ələkbərli
Azərbaycan Jurnalistlər Və
Yazıçılar Birliyinin Üzvü.
376