Əmək və Əhalinin Sosial Müdafiəsi Nazirliyi tabeliyində Sosial Xidmətlər Agentliyinin
Əlilliyi olan Şəxslərin Peşə-Əmək Reabilitasiyası Mərkəzində “İnsan hüquq və
azadlıqlarının dövlət təminatı” mövzusunda maarifləndirmə tədbiri keçirilib.
Azərbaycan Respublikasının İnsan Hüquqları üzrə Müvəkkili (Ombudsman)
tərəfindən elan olunmuş “İnsan Hüquqları Aylığı” çərçivəsində keçirilmiş həmin tədbirdə
Nazirliyin Aparatının Dövlət qulluğu və kadr məsələləri şöbəsinin nümayəndəsi, mərkəzin
əməkdaşları və peşə-əmək reabilitasiyasına cəlb edilmiş əlilliyi olan şəxslər iştirak ediblər.
Ombudsman Aparatının Beynəlxalq təşkilatlar və vətəndaş cəmiyyəti institutları ilə
əməkdaşlıq şöbəsinin sektor müdiri Müqalib Mahmudov tədbirdə çıxış edərək, ölkəmizin
Konstitusiyasında və tərəfdar çıxdığı beynəlxalq müqavilələrdə öz əksini tapmış insan
hüquq və azadlıqları, onların istər dövlətdaxili, istərsə də beynəlxalq müdafiəsi
mexanizmləri, bu sahədə aparılan genişmiqyaslı islahatlar, o cümlədən Müvəkkilin gördüyü
işlər barədə ətraflı məlumat verib.
Eyni zamanda, sosial cəhətdən həssas əhali qruplarının, eləcə də əlilliyi olan
şəxslərin sosial-hüquqi müdafiəsi istiqamətində həyata keçirilən fəaliyyətlər, irəli sürülən
təkliflər, əldə olunan nailiyyətlər, habelə qarşıda duran vəzifələr barədə fikir mübadiləsi
aparılıb, iştirakçılar tərəfindən verilən suallar cavablandırılıb.
Mətbuat xidməti