"Şuşa bəyannaməsinin imzalanmasında iki il ötür. Bu bəyannamə Azərbaycanın qələbəsinin, iradəsinin bəyanıdır və Azərbaycanı üstün bir mövqeyə gətirib çıxartdı. Türkiyə ilə imzalanmış olan bu bəyannamə əlbəttə ki, Azərbaycanın gücünə güc qatır və ölkəmizi bir daha bölgənin söz sahibi olaraq təşviq edir". Bu sözləri Diaspor.info-ya açıqlamasında millət vəkili Jalə Əliyeva deyib
Onun sözlərinə görə, eyni zamanda, bu bəyannamənin imzalanması ölkə başçısının qətiyyəti və dünyada ayrılmaz iki dost dövlət olan Türkiyə-Azərbaycan birlikdəliyinin, çoxtərəfli partnyorluğunun növbəti bir təzahürü idi: "Şuşa Bəyannaməsi Ermənistanın fiyaskosu idi. Bəyannamə bölgədə şərtlərin dəyişdiyinin təsdiqi oldu. Həmin gündən etibarən Azərbaycan və Türkiyənin iştirakı olmadan və onların iradəsi xaricində hər hansı bir addımın mümkünsüzlüyü təsdiq olundu. Biz artıq sülh müqaviləsinin imzalanmasını gözləyirik".
Deputat sözlərinə davam edərək bildirib ki, təəssüf ki, Ermənistan təxribatlarına son vermir: "Yenə də kapitulyasiya müqaviləsinin şərtlərinə əməl olunmadı. Azərbaycan Prezidentinin hər zaman söylədiyi kimi, dövlətimiz bütün təzyiqlərə və hücumlara adekvat cavab verməyə qadirdir. Həmişə "dəmir yumruq" öz yerindədir. Ermənistan da bunu anlamalıdır".
