Diaspor info xəbər verir ki, Naxçıvan Şəhər İcra Hakimiyyətində “14 iyul 1969-cu il: Müstəqil və qüdrətli Azərbaycanın təməlinin qoyulduğu gün” mövzusunda tədbir keçirilib.
Tədbirdə Naxçıvan Şəhər İcra Hakimiyyətinin başçısı Mirsənani Seyidov bildirib ki, Azərbaycanın çoxəsrlik dövlətçilik tarixində Heydər Əliyev mərhələsinin müstəsna yeri vardır. Bu dövr öz başlanğıcını 1969-cu il 14 iyul tarixindən götürür. Məhz xalqımızın ümummilli lideri Heydər Əliyev Azərbaycanı 1969-1982-ci illərdə inkişaf etmiş respublikaya çevirərək bugünkü müstəqilliyimizin təməlini hazırlayıb, gələcək nəsillər üçün əvəzsiz, qiymətli miras qoyub. 1969-cu ildən başlanan quruculuq xəttinin 1993-cü ildən sonra davam etdirilməsi müstəqil Azərbaycanın daha da güclənməsinə səbəb olub.
AMEA Naxçıvan Bölməsinin sədri, akademik İsmayıl Hacıyev qeyd edib ki, bu gün ölkəmizdə qazanılan uğurların təməlində Heydər Əliyevin xilaskarlıq missiyası, ondan sonrakı dövrlərdə həyata keçirdiyi düşünülmüş və məqsədyönlü siyasət dayanır. Prezident İlham Əliyev ulu öndərin möhkəm təməl üzərində qurduğu həmin xətti uğurla davam etdirməklə Azərbaycanı ən uca zirvələrə yüksəldir.
Tədbirdə YAP Naxçıvan Şəhər Təşkilatının sədri Elman Cəfərli görkəmli dövlət xadimi Heydər Əliyevin Azərbaycana rəhbərliyinin birinci dövründə respublikamızda milli kadrların yetişdirilməsi ilə bağlı atdığı addımlar və Bakıda Cəmşid Naxçıvanski adına Hərbi Məktəbin yaradılmasının tarixi əhəmiyyəti barədə danışıb. Vurğulayıb ki, ümummilli liderin həmin dövrlərdə başladığı hərbi quruculuq prosesi 20 il sonra müstəqil Azərbaycanın Silahlı Qüvvələrinin hərbçi kadrlarla təminatında böyük rol oynayıb. 2020-ci il sentyabrın 27-də başlayan və 44 gün davam edən Vətən müharibəsində Azərbaycan Silahlı Qüvvələri düşmən ordusunu diz üstə çökdürərək onu təslimçilik aktını imzalamağa məcbur edib.
Tədbirin sonunda ulu öndər Heydər Əliyevə həsr olunmuş filmə baxış olub.
Adilə Səfərova
