Şəhid Anası: ermənilər hiyləgər millətdir, əgər məğlubiyyətlə razılaşmasalar və üçüncü Qarabağ savaşı başlayarsa bu dəfə Şanlı Azərbaycan əsgəri İrəvanda dayanacaqdır!
Azərbaycanın dilbər guşələrindən biri olan Qax rayonunda, şəhər və bir neçə kəndində olduq. Səfərimiz xəbərsiz olduğuna görə video müsahibələrdə müxtəlif texniki qüsurlar oldu. Düşündük ki, əsil həqiqəti çəkib oxuculara təqdim etmək üçün anidən bir neçə kəndə getmək bizə kifayət edəcəkdir. İlk öncə Qax şəhərində olduq, şəhidlər xiyabanını ziyarət etdik, daha sonra şəhərə öz gözəlliyini bəxş edən Heydər Əliyev parkına gələrək Ümummilli liderimizi də yad etdik. Sübh tezdən Qax şəhərində fəaliyyət göstərən iki məscidə təşrif buyurduq. Burada Qax rayonunun axundu ilə görüşüb həmsöhbət olduq. Daha sonra Qum, Ləkit və Zərnə kəndlərində də, olduq. Zərnə və Ləkit kəndlərində bir sıra sosial obyektlərə, təhsil, mədəniyyət və səhiyyə müəssisələrinə də baş çəkdik. Zərnə kəndində bir neçə kənd sakinindən video müsahibə aldıq. Kənddə fəaliyyət göstərən və müasir standartlara cavab verən tam orta məktəb, əsaslı təmirdən çıxmış sənətkarlıq evini, kitabxana və tibb məntəqəsini də, ziyarət etdik. Gördüklərimiz ürəkaçan oldu, ucqar bir dağ kəndində yaradılan gözəl şərait onu deməyə əsas verir ki, dövlətimizin qüdrəti Azərbaycanın hər bir guşəsində hiss olunur. Zərnə kəndində aldığım müsahibələrdə yalnız dövlətimizin öz vətəndaşlarına göstərdiyi qayğıdan geniş söhbət açılır. Kənd camaatı təbii qazla bağlı problemin olduğunu da vurğuladılar, dedilər ki, hələ sovetlər birliyi dövründə belə bu kənddə mavi yanacaq olmayıb. Nəzərə alsaq ki, bu gün qaz çəkilişi dövlət proqramları çərçivəsində öz həllini tapır, deməli zərnəlilər də öz növbələrini gözləməli olacaqlar.
Şəhər camaatı və kənd ağsaqqalları ilə etdiyimiz səmimi söhbətlərdən belə anladıq ki, Qax rayon icra hakimiyyətinin başçısı Musa Şəkiliyev də, Cənab Prezidentin tapşırıqlarını yüksək səviyyədə yerinə yetirir. Belə ki, icra başçısının tez-tez səyyar qəbul təşkil etməsi, şəhər və kənd camaatının qarşılaşdığı problemlərinin yerindəcə öz həllini tapması deməkdir. Bizimlə səmimi söhbət edən, ancaq nədənsə adının çəkilməsini istəməyən bir ağsaqqal dedi ki, Qax şəhərindəki şəhidlər xiyabanına gedin və rayon rəhbərliyinin bu təbəqədən olan insanlara göstərdiyi diqqət və qayğının hansı səviyyədə olduğunun şahidi olacaqsınız.
Biz Qax şəhərindəki şəhidlər xiyabanı ilə yanaşı rayonun Zərnə kəndindən olan Şəhid Hacıəhmədli Hacıəhməd Həsən oğlunun doğulub boya-başa çatdığı evə getdik və Şəhid anasını ziyarət etdik. Şəhidimiz Hacıəhməd Həsən oğlu İkinci Qarabağ savaşı, 44 gün davam edən "Vətən Müharibəsində" şəhidlik zirvəsinə ucalıb. Şəhid anası əvvəlcə Dövlət başçısı İlham Əliyevə və onun yerdəki nümayəndəsi Musa Şəkiliyevə onlara göstərilən diqqət və qayğıya görə öz minnətdarlığını bildirdi. Şəhid anasının video müsahibəsində dediyi bir fikir diqqətimizi daha çox çəkdi:- ermənilər hiyləgər millətdir, əgər məğlubiyyətlə razılaşmasalar və üçüncü Qarabağ savaşı başlayarsa bu dəfə Şanlı Azərbaycan əsgəri İrəvanda dayanacaqdır!
FOTO VƏ VİDEO MATERİALLAR:
Əlmaniz Ələkbərli
Azərbaycan Yazıçılar Və
Jurnalistlər Birliyinin Üzvü.
2 547
