İsrailli sabiq nazir ölkəsinin Azərbaycana içməli su qıtlığı problemində kömək etmək imkanından yazıb
“Azərbaycanlılar içməli suyun əsas hissəsini son illər su qıtlığı ilə üzləşən Kür və Araz çaylarından alırlar. Onlar İsrail modelindən istifadə edəcəkləri halda, bu böhrandan çıxa biləcəklərinə inanırlar”.
Bu barədə İsrailin sabiq rabitə, peyk və kibertəhlükəsizlik naziri, İqtisadi Sülh Mərkəzinin prezidenti, tanınmış siyasətçi və politoloq Ayub Kara ABŞ-ın populyar “Jewish News Syndicate” nəşrində dərc olunmuş “İsrailin duzsuzlaşdırma təcrübəsi dünyaya kömək edə bilər” sərlövhəli məqaləsində bildirib.
Birləşmiş Millətlər Təşkilatının məlumatına əsasən, dünyada iki milyarddan çox insanın təhlükəsiz içməli suya çıxışı olmadığının, habelə daşqınlar və quraqlıqların dözülməz vəziyyəti daha da ağırlaşdırdığının vurğulandığı məqalədə İsrail Duzsuzlaşdırma və Su Təmizləmə Cəmiyyətinə istinadən qeyd olunub ki, sözügedən ölkə suyun idarə edilməsində əldə etdiyi böyük nailiyyətlərlərlə tanınır. Dünyanın ən böyük və ən qabaqcıl duzsuzlaşdırma zavodlarından bəzilərini inşa etmiş İsrail suyun təkrar istifadəsi üzrə dünya lideridir və dünyada su itkisinin ən yüksək minimumuna malik ölkələrdəndir. İyirmi il əvvəl su çatışmazlığı ilə üzləşən bu ölkə indi qonşularına su böhranlarının öhdəsindən gəlməkdə və təbii su ehtiyatlarını artırmaqda kömək edir, habelə qlobal iqlim dəyişikliyi və ekoloji böhranı daha da gücləndirən bu dəhşətli tendensiyanın qarşısını almaq üçün qlobal miqyasda səylər göstərir.
Eyni zamanda qeyd olunub ki, bu ilin əvvəlində ABŞ-ın Arizona ştatında 5,5 milyard dollar dəyərində duzsuzlaşdırma zavodu tikən İsrail indi Azərbaycana su böhranının həllində kömək göstərməyə hazırdır. Belə ki, İsrail artıq Bakıdan 80 kilometr cənubda Azərbaycan üçün duzsuzlaşdırma qurğusu tikib, üstəlik, Azərbaycan İnvestisiya Şirkəti ASC ilə İsrailin “IDE Water Assets Ltd” şirkəti arasında Xəzər dənizində suyun duzsuzlaşdırılması kompleksinin tikintisini nəzərdə tutan müvafiq anlaşma memorandumu imzalanıb. Diqqətə çatdırılıb ki, sözügedən şirkət Çin, Hindistan, ABŞ və Avstraliya da daxil olmaqla 40 ölkədə 400-dən çox duzsuzlaşdırma qurğusu tikərək istismara verib. Hazırda Azərbaycanda Xəzər dənizi layihəsinin birinci mərhələsi həyata keçirilir və bununla əlaqədar Azərbaycan Dövlət Su Təsərrüfatı Agentliyi ilə İsrailin milli şirkəti, bu ölkənin su idarəçiliyi üzrə aparıcı qurumu olan “Mekorot Water” arasında texniki məsləhətləşmələr üzrə müqavilə imzalanıb.
Məqaləni ətraflı şəkildə aşağıdakı linkdən oxumaq mümkündür:
https://www.jns.org/israeli-desalination-can-help-the-world/
