Türkiyənin Qafqaz Universiteti yanında Strateji Araşdırmalar Mərkəzi Qarsda “Cənubi Qafqazın geosiyasəti və Zəngəzur dəhlizi” mövzusunda müzakirələr təşkil edib.
Diaspor info AZƏRTAC-a istinadən xəbər verir ki, müzakirələrdə Azərbaycanın Qarsdakı baş konsulu Nuru Quliyev, Qafqaz Universitetinin rektoru professor Hüsnü Kapu, alimlər, ekspertlər, ali məktəb tələbələri iştirak ediblər.
Qafqaz Universitetinin rektoru Zəngəzur dəhlizinin strateji əhəmiyyətinə diqqət çəkib. Bu dəhlizin açılması Türkiyənin dost və qardaş ölkələrlə əlaqələrinin möhkəmlənməsinə öz töhfəsini verəcək.
“Yeni dəhliz bütün türk dünyası üçün mühümdür. Bu marşrut nəqliyyat xərclərini azaldacaq, beynəlxalq və regional ticarət üçün güclü stimula çevriləcək, xalqlar arasında tarixi və mədəni əlaqələri möhkəmləndirəcək”, - deyə Türkiyənin şərqinin ən aparıcı ali məktəblərindən birinin rektoru şərh edib.
Azərbaycanın Qarsdakı diplomatik missiyasının rəhbəri Nuru Quliyev də tədbir iştirakçılarına Zəngəzur dəhlizinin rolundan söhbət açıb.
“Dəhlizin açılması ilə İstanbuldan yüklər qısa müddət ərzində Qarsa və İğdıra, daha sonra Azərbaycana tədarük ediləcək. Həm avtomobil, həm də dəmir yolu nəqliyyatı vasitəsilə fasiləsiz yük daşımaları üçün imkan yaranacaq”, - deyə azərbaycanlı diplomat bildirib.
O vurğulayıb ki, Zəngəzur dəhlizinin bir hissəsi Ermənistanın yerləşdiyi əzəli Qərbi Azərbaycan torpaqlarından keçir.
Qafqaz regionunda gedən proseslərə ayrı-ayrı dövlətlərin, o cümlədən Rusiya və İranın təsiri məsələləri üzrə fikir mübadiləsi də aparılıb.
Yeni nəqliyyat marşrutunun region üçün sosial-iqtisadi əhəmiyyəti müzakirə olunub.
