İzmirdə "Qərbi Azərbaycana dönüşün Türkiyə və Azərbaycan mediasında təbliği" mövzusunda forum keçirilib
Türkiyə Respublikasının Prezident Administrasiyasının Kommunikasiya İdarəsinin İzmir şöbəsinin ev sahibliyində Türkiyə-Azərbaycan Dərnəkləri Federasiyası (TADEF) və "3-cü Sektor" İctimai Birliyi tərəfindən təşkil olunan Forumda ictimai-siyasi xadimlər, QHT-lərin və diaspor təşkilatlarının nümayəndələri iştirak etmişlər.
Forum şəhidlərin bir dəqiqəlik sükutla yad edilməsi və hər iki ölkənin himnlərinin səsləndirilməsi ilə başlayıb. Giriş sözü ilə TADEF-in üzvü, İzmir Azərbaycan Mədəniyyət və Həmrəylik Dərnəyinin sədri Eşref Tuna çıxış edib. Daha sonra Kommunikasiya İdarəsinin bölgə müdiri Çengiz Kutlu Yüksel, TADEF sədrinin müşaviri Pərviz Məmmədzadə, layihə rəhbəri, "3-cü Sektor" İB-nin rəhbəri, Qarabağ qazisi Nahid Canbaxışlı, 24-cü çağırış TBMM-in Ədalət və İnkişaf Partiyasından millət vəkili, Türk İnternet Media Birliyinin rəhbəri Rıfat Sait çıxış edərək, bu toplantıların post-münaqişə dövründən sonra Prezident İlham Əliyev tərəfindən gündəmə gətirilən Qərbi azərbaycanlıların hüquqlarının təmin olunması və onların vətənlərinə dönməsi prosesinin gündəmdə tutulmasına vəsilə olacağına inandıqlarını dilə gətiriblər.
Forumun ikinci panelində Prof. Dr. Toğrul İsmayıl, araşdırmaçı-jurnalist Nigar Ögeday, TADEF sədr müavini Settar Kaya çıxış edərək, Qərbi Azərbaycan anlayışı və həqiqətləri, eləcə də Azərbaycanın haqlı tələbləri barədə çıxış ediblər.
Tədbirdə Ədalət və İnkişaf Partiyasının İzmir millət vəkili Şəbnəm Bursalı və Milliyyətçi Hərəkat Partiyasının İzmir millət vəkili Tamer Karaosmanoğlunun Forum iştirakçılarına təbrik məktubları oxunub.
İzmir ziyarəti çərçivəsində TADEF sədrinin müşaviri Pərviz Məmmədzadə nümayəndə heyəti ilə birlikdə İzmir Qarabağlar Bələdiyyəsinin sədri Emine Helil Kınayı və Bornova kaymakamı Muzaffer Şahinerlə görüşüb, İzmir Forumu və TADEF-in fəaliyyətləri barədə məlumat verib, xatirə hədiyyələri təqdim edib.
[center]
