Polşanın Kielce şəhərində “Azərbaycan və Polşanın 100 illik münasibətləri” adlı tədbir keçirilib
“Xarıbülbül” Dünya Azərbaycanlıları Mədəniyyət Assosiasiyasının təşkilatçılığı ilə Kielce şəhərində yerləşən Mədəni Dialoq Muzeyində (''Muzeum Dialogu Kultur'') "Azərbaycan və Polşanın 100 illik münasibətləri'' adlı tədbir baş tutub. Tədbirdə Azərbaycan və Polşa icmasının nümayəndələri iştirak ediblər.
Tarix elmləri doktoru, professor, AMEA-nın akademik Ziya Bünyadov adına Şərqşünaslıq İnstitutunun əməkdaşı Solmaz Rüstəmova-Tohidi və Varşava Universiteti Şərqşünaslıq Fakültəsi Şərqi Avropa Araşdırmaları Mərkəzinin professor assistenti Şəhla Kazımova tədbirdə təqdimatla çıxış ediblər. Onlar iki ölkə arasında əlaqələrin tarixindən, münasibətlərin mövcud vəziyyətindən bəhs ediblər. İki ölkə arasında ötən yüzilliklərdəki tarixi əlaqələr, Polşada müxtəlif sahələrdə xidmətləri olan məşhur azərbaycanlılar, həmçinin Azərbaycanda müxtəlif sahələrdə fəaliyyət göstərən polşalılar haqqında iştirakçıları məlumatlandırıblar.
Tədbirin sonunda “Xarıbülbül” Dünya Azərbaycanlıları Mədəniyyət Assosiasiyası və Mədəni Dialoq Muzeyi arasında əməkdaşlığa dair protokol imzalanıb. Protokola əsasən muzeydə bir il ərzində mütəmadi olaraq Azərbaycanın mədəniyyətinə və tarixinə dair sərgi, həmçinin polyak dilində Azərbaycanın tarixi haqqında kitablar nümayiş etdiriləcək.
