Orta Dəhlizin inkişafı əməkdaşlığın daha da genişləndirilməsi üçün əlavə imkanlar yaradır.
Diaspor info xəbər verir ki, bu barədə Azərbaycanın xarici işlər naziri Ceyhun Bayramov Ankarada keçirilən Azərbaycan-Türkiyə-Özbəkistan xarici işlər, iqtisadiyyat/ticarət və nəqliyyat nazirlərinin 2-ci üçtərəfli görüşündə çıxışı zamanı danışıb.
XİN başçısı üçtərəfli əməkdaşlığın çoxşaxəli xarakter daşıdığını da vurğulayıb.
Nazir diqqətə çatdırıb ki, təhlükəsizlik, iqtisadiyyat, ticarət, investisiya, infrastruktur və nəqliyyat-kommunikasiya daxil olmaqla, geniş əməkdaşlıq sahələri mövcuddur.
Ceyhun Bayramov, həmçinin Asiyanı Avropa ilə birləşdirən mühüm ticarət və nəqliyyat marşrutu olan Orta Dəhlizin inkişafı vasitəsilə əməkdaşlığın daha da genişləndirilməsi üçün əlavə imkanların yarandığını qeyd edib.
Çıxışda mövcud regional potensialdan istifadə edərək Yaxın Şərq və Əfqanıstan da daxil olmaqla, daha geniş regionun sülh, təhlükəsizlik və inkişafına töhfə verilməsi də vurğulanıb.
