Xocalı soyqırımı Azərbaycanın dinc əhalisinə qarşı törədilən misli görünməmiş qəddarlıqdır.
Diaspor info xəbər verir ki, bu barədə Beynəlxalq Türk Mədəniyyəti və İrsi Fondunun “X” sosial şəbəkəsindəki hesabında paylaşım edilib.
“Bu gün Xocalı soyqırımının faciəli hadisələrindən - Azərbaycanın dinc vətəndaşlarına qarşı yönəlmiş misli görünməmiş qəddarlıq və zorakılığın simvoluna çevrilmiş gecədən 33 il ötür. Türk Mədəniyyəti və İrsi Fondu Xocalı qurbanlarının xatirəsini yad edir və bütün Azərbaycan xalqına dərin hüznlə başsağlığı verir”, - paylaşımda qeyd edilib.
Qeyd edək ki, bu gün Ermənistan silahlı qüvvələri tərəfindən Rusiyanın 366-cı motoatıcı alayının iştirakı ilə Azərbaycanın Xocalı şəhərinin işğalı və Xocalı soyqırımının törədilməsinin 33-cü ildönümüdür. 1992-ci il fevralın 25-dən 26-na keçən gecə erməni hərbi birləşmələri Rusiyanın 366-cı motoatıcı alayının köməyi ilə Xocalı şəhərinə hücum edib. Şəhərin 2 500 sakini xilas olmaq üçün Ağdam istiqamətində hərəkət edib. Ermənilər isə dinc sakinləri gülləbaran ediblər.
Erməni təcavüzkarlarının Azərbaycan xalqına qarşı törətdiyi növbəti kütləvi qırğın 613 nəfərin, o cümlədən 106 qadın, 63 uşaq, 70 qocanın həyatına son qoyub. 1 275 dinc sakin əsir götürülüb, onlardan 150 nəfərin taleyi hələ də məlum deyil. 475 nəfər şikəst olub. 8 ailə bütünlüklə məhv edilib. 25 uşaq hər iki valideynini, 130 uşaq isə valideynlərindən birini itirib.
