HEYDƏR ƏLİYEV MƏKTƏBLİLƏRİN GÜZÜ İLƏ ADLI İNŞA YAZI MÜSABİQƏSİNİN QAX RAYON ÜZRƏ QALİBLƏRİ TƏLTİF OLUNUBLAR.-FOTOLAR.
Məlum olduğu kimi qarşıdan Ümummilli lider Heydər Əliyevin anadan olmasının 102-ci ildönümü gəlir. Bu münasibətlə respublikanın hər yerində silsilə tədbirlər keçirilir. Elm və Təhsil nazirliyi bu sahədə daha çox tədbirlər keçirir desək, yanılmarıq. Mədəniyyət sahəsində də Ulu öndərin doğum günü ilə bağlı silsilə tədbirlər keçirilir. Belə tədbirlərdən biri də, artıq illərdir ənənə halına çevrilən inşa yazı müsabiqələrinin keçirilməsidir. 
Azərbaycan Yazıçılar Birliyinin Zaqatala bölməsi də artıq üçüncü ildir ki, Ümummilli liderimiz Heydər Əliyevin doğum günüylə bağlı inşa yazı müsabiqəsinin əsas təşkilatçılarındandır. Belə ki, AYB Şimal-qərb bölgəsi, Şəki-Zaqatala regional təhsil idarəsi, YAP Qax rayon təşkilatı, ATİAHİ-nin Qax rayon komitəsi və Qax rayon Heydər Əliyev mərkəzinin birgə təşkilatçılığı ilə “Heydər Əliyev Məktəblilərin Gözü İlə”adlı inşa yazı müsabiqəsi keçirilib. Ümumiyyətlə isə sözügedən inşa yazı müsabiqəsi Qəbələ, Oğuz, Şəki, Qax, Zaqatala və Balakən rayonlarında təhsil alan məktəblilər arasında keçirilir. Artıq qaliblər müəyyənləşdiyi üçün onların təltifolunma mərasimlərinə start verilib. İlk belə tədbir 25 aprel 2025-ci ildə Qax rayon Heydər Əliyev Mərkəzində keçirilib.
Tədbir Dövlət himninin səsləndirilməsi, Ulu öndər Heydər Əliyevin və şəhidlərimizin ruhunu bir dəqiqəlik sükutla yad etməklə başlayıb. Daha sonra çıxış üçün söz inşa yazı müsabiqəsinin əsas təşkilatçılarından biri olan AYB Zaqatala Bölməsinin sədri Əlmaniz Ələkbərliyə verilib. Əlmaniz müəllim tədbir iştirakçılarını salamladıqdan sonra üzünü gənclərə və yuxarı sinif şagirdlərinə tutaraq deyib;-inşa yazı müsabiqəsinin keçirilməsində bir məqsədimiz var, Heydər Əliyev irsini daha yaxından öyrənmək: ”Hamıya məlumdur ki, Azərbaycan yenicə müstəqilliyini elan etdikdən sonra səriştəsiz rəhbərlərin səhvi üzündən xalqımız vətəndaş müharibəsi astanasında idi.
Bu vaxt xalqımız öz müdrik oğlu Heydər Əliyevə üz tutaraq, xalqı bu bəladan xilas etməsini istədi. Ümummilli lider Heydər Əliyev paytaxt Bakı şəhərinə qayıdaraq təkcə xalqımızı bu bəladan xilas etmədi. O elə bir uğurlu siyasətin təməlini qoydu ki, bir müddət sonra Azərbaycan dövləti iqtisadi cəhətdən qafqazın ən güclü dövlətlərindən birinə çevrildi. Siz məktəblilər dahi şəxsiyyət haqqında çox şeyləri bilmir və onun etdiklərini daha yaxşı dərk edə bilmirsiniz. Bu gün dünyada inanılmaz hadisələr baş verir, bir çox iri dövlətlər özündən kiçik dövlətlərin torpaqlarını bütün dünyanın gözü qarşısında işğal edir. 
Və həmişə olduğu kimi dünya bu ədalətsizliyə susur. Azərbaycan dövləti isə iki əsrlik tarixində heç vaxt edə bilmədiyini məhz Heydər Əliyev siyasətinin gücü ilə edərək tam suverenliyini bərpa edə bildi. Belə ki, Ümummilli lider Heydər Əliyevin siyasi varisi olan, Ali Baş komandan İlham Əliyevin rəhbərliyi ilə cəmi 44 gün davam edən “Vətən Müharibəsi” zamanı xalqımız Qarabağı tamamilə işğaldan azad etdi. Bu təkcə torpaqlarımızın geri qaytarılması ilə yadda qalmadı, dünyanın supergüclərinin hələ heç bir müharibələrdə istifadə etmədiyi bir taktika ilə 21-ci əsrin ən müasir müharibəsinin aparılması ilə də yaddaşlarda qaldı. Azərbaycan əsgəri XTQ döyüşçüləri ilə yanaşı, PUA və İtiqovanlarla düşməni torpaqlarımızdan qovub çıxardı. 
Bütün bunlara məhz Heydər Əliyev siyasətinin gücü ilə nail olmaq olardı. Belə ki, Ulu öndərin uzaqgörən siyasəti nəticəsində əvvəlcə atəşkəs əldə olundu, daha sonra iqtisadi layihələr, iri neft müqavilələri sayəsində Azərbaycan iqtisadiyyatı güclənərək dövlətimizi qüdrətli bir dövlətə çevirdi. Bu gün Dünyanın ən aparıcı dövlətləri belə qafqazda hər hansı bir layihəni həyata keçirmək istəyirsə Azərbaycan dövlətinin maraqları ilə mütləq hesablaşırlar. İstəyirəm ki, məktəblilərimiz Heydər Əliyevin nə qədər dahi bir şəxsiyyət olduğunu onun gördüyü işlərlə tanış olaraq dərk etsinlər.
“Heydər Əliyev Məktəblilərin Gözü İlə” adlı inşa yazı müsabiqəsinin təşkilində Şəki-Zaqatala təhsil idarəsi Qax rayon təhsil sektorunun müdiri Babək Heydərov, ATİAHİ Qax rayon komitəsinin sədri Təranə Həşimova, YAP Qax rayon təşkilatının sədri Natiq Allahverdiyev, Qax rayon Heydər Əliyev Mərkəzinin rəhbəri Arzu Dunusovaya təşkilati dəstəyə görə təşəkkür edirəm.
Sonda Qax RİH-nin başçısı Musa Şəkiliyevə və tədbirimizdə iştirak edən başçının müavini - İctimai-siyasi və humanitar məsələlər şöbəsinin müdiri Vəfa Heydərovaya həmişə bizim yanımızda olduqlarına və yaxından dəstək göstərdiklərinə görə xüsusi təşəkkürümü bildirirəm.
Daha sonra tədbirdə söz Qax RİH başçısının müavini - İctimai-siyasi və humanitar məsələlər şöbəsinin müdiri Vəfa Heydərovaya verilib. Vəfa xanım da Ulu öndər Heydər Əliyevin misilsiz xidmətlərindən danışaraq, hələ sovetlər birliyi dövründə on beş respublika arasında Azərbaycanın ən geridə qaldığını deyib. Və məhz Heydər Əliyev Azərbaycana rəhbərliyə gəldikdən sonra respublikamız inkişafına görə birinciliyə yüksələ bilib. Sonra Vəfa xanım Heydər Əliyev siyasəti sayəsində bu gün Azərbaycanın çox sürətlə inkişaf etdiyini xüsusi vurğulayıb. O bildirib ki, bu gün zamanla itirilən torpaqların geri qaytarılması anıdır:- Artıq biz Azərbaycan Respublikası Prezidenti Cənab İlham Əliyevin apardığı uğurlu siyasət nəticəsində böyük problemlərimizdən bir qismini tam həll edə bilmişik, indi isə yolumuz Qərbi Azərbaycanadır!
Daha sonra söz YAP Qax rayon təşkilatının sədri Natiq Allahverdiyevə verilib. Natiq müəllim də öz çıxışında dahi şəxsiyyət Heydər Əliyev haqqında geniş danışıb, onun xalqımızı və dövlətimizi düçar olduğu çox çətin bir vəziyyətdən işıqlı sabaha çıxarmasını xüsusi vurğulayıb. Natiq müəllim belə tədbirlərin keçirilməsinin, məktəblilərin Ulu öndər haqqında inşa yazıları yazmasının Heydər Əliyev irsinin öyrənilməsində böyük rol oynaya biləcəyini vurğulayıb. Sonda qalibləri təbrik edən Natiq müəllim artıq ənənə halını almış inşa yazı müsabiqəsinin əsas təşkilatçılarından olan AYB Zaqatala bölməsinə öz minnətdarlığını bildirib.
Bundan sonra təltifolunma mərasimində çıxış edən Şəki-Zaqatala regional təhsil idarəsi-Qax rayon Təhsil sektorunun müdiri Babək Heydərov artıq ənənə halını almış inşa yazı müsabiqəsinin keçirilməsinin təqdirəlayiq hal olduğunu vurğulayıb:- Bilirsiniz ki, Ümummilli lider Heydər Əliyevin doğum günü ərəfəsində Elm və Təhsil nazirliyi silsilə tədbirlər keçirir. Ən yaxşı təqdimat, vəyaxud inşa yazı müsabiqələri, bir çox idman yarışları da, məhz məktəblilər arasında keçirilir ki, bu da Ulu öndər Heydər Əliyev irsinin öyrənilməsi və təbliğ olunmasına xidmət edir. Sevindirici haldır ki, artıq üçüncü ildir AYB Şimal-qərb regional bölməsi bizimlə birgə “Heydər Əliyev Məktəblilərin Gözü İlə” adlı inşa yazı müsabiqəsini keçirir və qalib məktəbliləri yazıçılar seçir. Buna görə AYB Şimal-qərb regional bölməsinin sədri Əlmaniz Ələkbərliyə xüsusilə təşəkkür edirəm.
Tədbirdə müsabiqənin əsas təşkilatçılarından biri olan ATİAHİ-nin Qax rayon komitəsinin sədri Təranə Həşimova da çıxış edib:-Belə tədbirlərin keçirilməsində əziyyəti keçən hər kəsə, xüsusilə AYB Şimal-qərb regional bölməsinin sədri Əlmaniz Ələkbərliyə təşəkkür edirəm. Ümummilli lider Heydər Əliyev haqqında günlərlə danışmaq olar. Məktəblilərin, xüsusilə yuxarı sinif şagirdləri arasında keçirilən inşa yazı müsabiqəsi, uşaqların Heydər Əliyev haqqında daha çox bilgiyə sahib olmalarına səbəb olacaqdır. Müstəqil Azərbaycan dövlətində elə bir sahə yoxdur ki, orada Heydər Əliyevin izi olmasın, odur ki, bu dahi şəxsiyyətin doğum günüylə bağlı keçirilən inşa yazı müsabiqələri təqdirəlayiqdir.
Sonra söz Qax rayon Heydər Əliyev Mərkəzinin direktoru Arzu Dunusovaya verilib. Arzu xanım Ümummilli liderimiz Heydər Əliyev haqqında, onun Azərbaycan xalqı və dövləti üçün etdiklərindən ətraflı danışıb. Müstəqil Azərbaycan dövlətini dağılmaq təhlükəsindən qurtaran dahi şəxsiyyət, sonradan onu dünyanın ən inkişaf etmiş dövlətləri siyahısına yüksəldə bildiyini xüsusi vurğulayan Arzu xanım Heydər Əliyevin möhtəşəm bir zirvə olduğunu deyib:-Ulu öndər möhtəşəm bir zirvədir, zirvə isə uzaqdan daha aydın görünür, biz ondan uzaqlaşdıqca o dahi şəxsiyyətin gördüyü işləri daha yaxşı analiz edə biləcəyik. İnşa yazı müsabiqəsinin keçirilməsi isə təqdirəlayiqdir və Qax rayonundan olan qalibləri ürəkdən təbrik edirəm.
Tədbirin sonunda qaliblərin adları elan olunub:-Qax Şəhər N. Allahverdiyev adına “2” nömrəli tam orta ümumtəhsil məktəbin “10”-cu sinif şagirdi Aydan Məmmədova “Heydər Əliyev Məktəblilərin Gözü İlə”adlı inşa yazı müsabiqəsində Qax məktəbliləri arasında birinci yerə layiq görülüb. İkinci yerə Qax şəhər V. Əliyev adına “3” nömrəli tam orta ümumtəhsil məktəbin “10”-cu sinif şagirdi Uğur Davudov layiq görülüb. Üçüncü yerə isə M. Ziyadov adına Qıpçaq kənd tam orta ümumtəhsil məktəbin “9”-cu sinif şagirdi Gülçıraq Muradova layiq görülüb.
Dördüncü yer, həvəsləndirici diploma isə İlisu kənd tam orta ümumtəhsil məktəbin “9”-cu sinif şagirdi Sədəf Əfəndiyeva layiq görülüb.
Qaliblərə müxtəlif hədiyyələr təqdim olunub.
[center]
Əlmaniz Ələkbərli
Diaspor.info saytının
Baş Redaktoru.
