Moldovada Yaşayan Azərbaycanlı Gənclərin II Forumu keçirilib
Azərbaycan Respublikasının Diasporla İş üzrə Dövlət Komitəsinin və ölkəmizin Moldovadakı səfirliyinin dəstəyi, Moldova Azərbaycanlıları Konqresinin birgə təşəbbüsü ilə II Gənclər Forumu keçirilib.
Deputatların, dövlət rəsmilərinin, xarici ölkələrin səfirlərinin, universitet rəhbərlərinin və soydaşlarımızın iştirak etdiyi forum Azərbaycanın və Moldovanın Dövlət himnləri səsləndirilməsi ilə başlayıb.
Moldova Azərbaycanlıları Konqresinin sədri Elçin Bayramov forumun Zəfərimizin 5 illiyinə həsr olunduğunu, Moldovada yaşayan azərbaycanlı gənclərin ölkənin ictimai-siyasi həyatında, mədəniyyət və idman sahəsində aktiv fəaliyyət göstərdiklərinndən bəhs edib.
Azərbaycanın Moldovadakı səfiri Ülvi Baxşəliyev Azərbaycanda gənclər siyasətinin təməlini Ulu Öndər Heydər Əliyevin qoyduğunu və dövlətimizin başçısı İlham Əliyevin bu siyasəti uğurla davam etdirdiyini diqqətə çatdırıb. Gələcək nəslin vətənpərvər ruhlu və geniş dünyagörüşlü şəxsiyyətlər kimi yetişməsinin dövlətin gənclər siyasətinin başlıca məqsədi olduğunu qeyd edib.
Diasporla İş üzrə Dövlət Komitəsinin şöbə müdiri Ruslan Quliyev çıxışında Gənclər Forumunun Zəfərimizin beşilliyi ərəfəsində keçirilməsini sevindirici kimi qiymətləndirib. Gənclərə diqqət və qayğının Müzəffər Ali Baş Komandan İlham Əliyev siyasətinin prioritet istiqaməti olduğunu deyib. Diasporla İş üzrə Dövlət Komitəsinin dünyada yaşayan gənclərimizin səmərəli fəaliyyəti üçün dəstəyini davam etdirdiyini bildirib.
Daha sonra tədbirdə iştirak edən Türkiyənin Moldovadakı səfiri Uyqar Mustafa Sertel, Moldova parlamentinin deputatları - İnsan Hüquqları və Millətlərarası Münasibətlər Komissiyasının sədr müavini Natalya Davidoviç, Dövlət Maliyyəsinə Nəzarət Komissiyasının sədr müavini Yevgeni Sinkeviç, Moldovanın Təhsil və Tədqiqatlar Nazirliyinin dövlət katibi Sergey Qurin azərbaycanlı gənclərin Moldova cəmiyyətinə uğurlu inteqrasiyasından danışıblar.
Forumda Moldova Azərbaycanlı Konqresinin gənclərinin ötən beş ilə dair hesabatı dinlənilib, idman və səhiyyə sahələrində təqdimatları izlənilib.
Tədbirin sonunda forum iştirakçıları adından Azərbaycan Respublikasının Prezidenti İlham Əliyevə müraciət qəbul olunub.
Müraciətdə deyilir: “Biz bir neçə gündən sonra Şanlı Zəfərimizin beşinci ildönümünü qeyd edəcəyik. Vətən müharibəsi Azərbaycanın möhtəşəm Qələbəsi ilə başa çatdı. Rəşadətli Ordumuz Sizin - Müzəffər Ali Baş Komandanın rəhbərliyi ilə dövlətçiliyimizin müasir tarixinin ən şərəfli səhifəsini yazdı. Xalqımız işğal altındakı torpaqlarını son 200 illik dövrdə ilk dəfə olaraq azad etdi. Azərbaycan gənci Sizin rəhbərliyiniz altında məhz qəlbindəki güclü Vətən sevgisi sayəsində döyüşlərin əsas ağırlığını qəhrəmancasına öz üzərinə götürərək, xalqımızın qələbə əzmini dünyaya nümayiş etdirdi və 44 günlük Vətən müharibəsində Zəfər salnaməsi yazdı.
Bu şərəfi bizə yaşadan müzəffər sərkərdəmizə, qüdrətli Ali Baş Komandanımıza – Sizə minnətdarıq.
Moldovada yaşayan azərbaycanlı gənclər Sizi bir daha əmin edir ki, apardığınız uzaqgörən, praqmatik siyasətiniz ətrafında sıx birləşərək Azərbaycanın inkişafında öz bilik və bacarıqlarını əsirgəməyəcək”.
