AYB ZAQATALA BÖLMƏSİ “3” YAŞINI QEYD EDİB.
AYB ZAQATALA BÖLMƏSİNİN ƏDƏBİ-BƏDİİ ORQANI OLAN “DEYİLƏN SÖZ YADİGARDIR” JURNALININ İLK NÜSXƏSİ İŞIQ ÜZÜ GÖRÜB. JURNALIN TƏQDİMATI VƏ AYB ZAQATALA BÖLMƏSİNİN YARANMASININ “3” YAŞINI-BÖLMƏ ÜZVLƏRİ ZAQATALA RAYONUNDA YERLƏŞƏN “TURANGÖL” RESTORANINDA QEYD EDİBLƏR.
Azərbaycan Yazıçılar Birliyinin Zaqatala Bölməsi 22 avqust 2022-ci ildə açılıb. Qax, Zaqatala və Balakən rayonlarını əhatə edən bölməyə Azərbaycan Yazıçılar Birliyinin üzvü Prezident təqaüdçüsü, Diaspor.info saytının təsisçisi və baş redaktoru Ələkbərov Əlmaniz Ələkbər oğlu seçilib. Şimal-qərb regional bölmə açıldıqdan sonra bu bölgədə də ədəbi mühit daha da inkişaf etməyə başlayıb. AYB Şimal-qərb regional bölməsinin üzvləri ildönümünü qeyd etməklə bərabər ədəbi-bədii orqanları olan “Deyilən Söz Yadigardır” jurnalının ilk nömrəsinin təqdimatına da böyük həvəslə hazırlaşmışdılar. Bir gün əvvələ aldıqları xoş xəbər də bölmə üzvlərinin sevincinə səbəb olmuşdur. 
Belə ki, AYB-nin üzvü, AYB Şimal-qərb regional bölməsinin fəal üzvü, 2024-cü ildə bölgədə “İlin Şairi” olmuş Nəbi Mülkümov “Dədə Qorqud” Milli fondu tərəfindən “Qızıl Ürək “ ordeninə layiq görülmüşdür. Bu münasibətlə Zaqatala rayon Heydər Əliyev Mərkəzində tədbir də keçirilib. AYB Zaqatala Bölməsinin üzvləri əvvəlcə həmin tədbirdə iştirak edib, daha sonra isə digər tədbirə gediblər. Heydər Əliyev Mərkəzində keçirilən tədbirdə ilk sözü Zaqatala RİH başçısı Mübariz Əhmədzadə deyib. Mübariz müəllim rayonda yaxşı ədəbi mühitin olduğunu xüsusi vurğulayaraq, AYB Zaqatala bölməsinin açılmasına verdiyi dəstəkdən də danışıb. “Dədə Qorqud” Milli Fondunun rəhbəri və “Azərbaycan Dünyası” jurnalının təsisçisi və baş redaktoru Eldar İsmayılovu rayon ziyalılarına və AYB üzvlərinə təqdim edən rayon rəhbəri sözü Eldar müəllimə verib. 
Eldar müəllim də çıxışı zamanı öz növbəsində Zaqatala və zaqatalalılar haqqında xoş sözlər deyərək, rayonda gedən işlərə xüsusi diqqət çəkdi. Və dedi ki, Zaqatala günü-gündən inkişaf edir, bu işlərdə Mübariz Əhmədzadənin rolu danılmazdır. Sonra Nəbi Mülkümovu səhnəyə dəvət edərək ona “Qızıl Ürək” ordünini təqdim etdi. Nəbi müəllimi də ona göstərilən etimadı doğruldacağına söz verərək ordenə layiq gördüklərinə görə “Dədə Qorqud” Milli Fondunun rəhbəri Eldar İsmayılova, Fondun idarə heyətinin üzvü Məmmədxan Hacıyevə və Jurnalın məsul katibi Nərgiz Namiq qızına öz təşəkkürünü bildirib. Daha sonra söz Azərbaycan Yazıılar Birliyi Zaqatala bölməsinin sədri Prezident təqaüdçüsü Əlmaniz Ələkbərliyə verilib. Əlmaniz müəllim öz çıxışında Zaqatala RİH başçısı Mübariz Əhmədzadənin rayon ziyalılarına, şair və yazıçılara, ümumiyyətlə sözə, söz sahiblərinə xüsusi diqqət göstərdiyini bildirib:-Azərbaycanda mədəniyyət sahəsinin adamlarına şair, yazıçı, rəssam, bəstəkar, müğənni vəs. 
bu təbəqədən olan ziyalılarımıza diqqət və qayğının təməli Ümummilli Lider Heydər Əliyev tərəfindən qoyulmuşdur. Təkcə Azərbaycanın dahi yazarı Hüseyn Cavidin nəşinin uzaq sibirdən gətirilərək doğulduğu Naxçıvanda dəfn edilməsi Ulu öndərin bu sahədən olan insanlara böyük diqqətindən xəbər verir. Bu hadisə həm də sovetlər birliyinin dövründə olduğu üçün sibirə sürgün edilmiş Azərbaycan oğlunun nəşinin geri gətirilməsi elə də asan deyildi, bu böyük cəsarət və qətiyyət tələb edirdi. Heydər Əliyev çox ciddi rəhbər olması ilə yanaşı həm də çox səmimi idi. Onun Qabil ilə etdiyi zarafatlara bu gün də internetdə milyonlarla baxış olub. Bu siyasət bu gün Cənab Prezident Ali Baş komandan İlham Əliyev tərəfindən də yüksək səviyyədə davam etdirilir. Bu gün Şuşa şəhərində “Vaqif” məqbərəsinin yenidən və əsaslı təmir olunması, mənfur qonşularımız tərəfindən güllələnmiş bir çox Qarabağ ziyalısının heykəllərinin qorunub saxlanılaraq bütün dünyaya nümayiş etdirilməsi də Prezidentin bu sahəyə daha çox diqqət göstərməsinə bariz nümunədir. Qəzəllərlə birgə ifa edilən Azərbaycan muğamının dünyaya tanıdılmasında Birinci Vitse-Prezident Mehriban Xanım Əliyevanın xidmətlərini də danmaq olmaz.
Bundan sonra AYB Zaqatala bölməsinin üzvləri qonaqlarla birgə “Turangöl” restoranında təşkil edilən təqdimat mərasiminə qatılıblar. Tədbiri giriş sözü ilə açan AYB Zaqatala bölməsinin sədri Əlmaniz Ələkbərli deyib:-hörmətli tədbir iştirakçıları nəzərinizə çatdırım ki, bölməmiz artıq üç yaşını tamamlayıb. Gəlin bu yola qısaca səyahət edək və baxaq görək biz bu üç ildə nələri edə bildik, nələri etməliyik? Ötən üç il ərzində dörd dəfə Şəki-Zaqatala Regional Təhsil İdarəsi, ATİAHİ-nin rayon komitələri və YAP-nın rayon təşkilatları ilə birgə “Ümummulli Lider Heydər Əliyevin” doğum günü ərəfəsində “Heydər Əliyev Məktəblilərin Gözü ilə” adlı inşa yazı müsabiqəsi keçirmişik. Bögənin şair və yazıçılarının yazdıqları şeir və hekayələrdən bir parçasını özündə əks etdirən Zaqatala, Qax-Balakən Almanaxları kitablarını çap etdirmişik. Hər ay hər üç rayonda ən azından bir dəfə görüşərək şeirlər səsləndirilib, müzakirələr aparmışıq. Yaşlı, xəstə şairlərimizi evlərində ziyarət etmişik, dünyasını dəyişənlərin qəbirlərini ziyarət etmişik. Biz bir ailə olaraq sıx birləşməyi bacardıq və biri-birimizin xeyir işlərində sevə-sevə iştirak edirik. 
Bu gün təqdimatına yığışdığımız AYB Zaqatala Bölməsinin ədəbi-bədii orqanı olan “Deyilən Söz Yadigardır” jurnalı da bizim nailiyyətimizdir. Biz birlikdə Şəhidlərimizin qanı, qazilərimizin canı bahasına başa gələn, Ali Baş Komandan İlham Əliyevin Dəmir Yumruğu sayəsində azad edilən Qarabağ torpaqlarını ziyarət etdik. Şuşa, Ağdam, Əskəran, Xankəndi vəs. şəhərləri gəzərkən orada görülən işlərlə tanış olduqda Azərbaycan Dövlətinin nə qədər qüdrətli olduğunun bir daha şahidi olduq. Əlbəttə görülən işləri sadalasaq günlərlə vaxt lazımdır, odur ki, tədbirimizin bədii hissəsinə keçmək istəyirəm. İlk öncə “Fəxri Fərman və Təşəkkürnamələri” təqdim edim sonra süfrəyə əyləşək.
Beləliklə də musiqi sədaları altında rəqs edən AYB Zaqatala bölməsinin üzvləri gözəl bir gün keçirərək “3” yaşlarını yaddaqalan etdilər.
Diaspor.info
Zaqatala Bölməsi.
