Dövlət İmtahan Mərkəzi (DİM) ali təhsil müəssisələrinin magistraturalarına iyunun 14-də keçirilmiş qəbul imtahanının ikinci cəhdi üzrə yekun nəticələri elan edib.
DİM-dən Diaspor.info-ya bildirilib ki, bundan əvvəl qapalı və kodlaşdırıla bilən açıq tipli 95 tapşırıq üzrə nəticələr açıqlanmışdı. Hazırda isə xarici dil fənləri üzrə esse tapşırıqlarının qiymətləndirilməsi də yekunlaşdırılıb və iştirakçıların yekun imtahan balları təqdim edilib. Bakalavrlar imtahanda qapalı və kodlaşdırıla bilən tapşırıqlar üzrə 95, esse üzrə isə 5 olmaqla ümumilikdə 100 bal toplaya bilərlər.
Yekun nəticələr DİM-in internet saytında yerləşdirilib. Bakalavrlar nəticələrini, həmçinin mobil operatorlar vasitəsilə “iş nömrəsi”ni 7727 nömrəsinə göndərməklə öyrənə bilərlər.
Qəbul imtahanında müsabiqə şərtlərini ödəyən bakalavrlar ixtisaslaşma seçiminə buraxılırlar. İxtisaslaşma seçimi “Magistratura səviyyəsi üzrə ixtisaslaşma seçimi cədvəli" əsasında aparılacaq. Həmin cədvəl “Magistr” jurnalının növbəti sayında dərc ediləcək.
İmtahan nəticələri ilə bağlı müraciətlərə baxılması məqsədilə DİM tərəfindən iyulun 8-dən etibarən telefon əlaqəsi vasitəsilə apellyasiya prosesi təşkil olunacaq. Apellyasiya komissiyasına müraciət etmək istəyən bakalavrlar iyulun 6-sı saat 10:00-dan iyulun 8-i saat 17:00-dək DİM-in internet saytında yerləşdiriləcək elektron ərizəni doldurmaqla qeydiyyatdan keçə bilərlər.
Bildirilib ki, bir bakalavrın müraciəti üzrə müzakirə üçün maksimum 15 dəqiqə vaxt ayrılır. Müəyyən edilmiş vaxt başa çatdıqda, kənar şəxsin müzakirəyə qoşulduğu və ya etik davranış qaydalarının pozulduğu hallarda müzakirə dayandırılır.
DİM qeyd edib ki, apellyasiya zamanı yalnız tapşırıqların məzmunu və yazı işi ilə bağlı müraciətlərə baxılacaq. Cavab kartında təlimata uyğun olmayan formada qeyd edilmiş cavablar, eləcə də optik oxunma zamanı səhv nəticəyə səbəb olan düzəlişlərlə bağlı müraciətlər isə nəzərə alınmayacaq.
