ZAQATALA RİH BAŞÇISI MÜBARİZ ƏHMƏDZADƏ YÜKSƏK NƏTİCƏ GÖSTƏRƏN MƏZUNLARLA GÖRÜŞÜB.
Zaqatala rayon “Təhsil Sektoru və Azərbaycan Təhsil İşçiləri Azad Həmkarlar İttifaqı Zaqatala Rayon Komitəsinin” təşkilatçılığı ilə ən yüksək bal toplayan məzunlarla rayon rəhbərinin görüşünü təşkil ediblər. Tədbirdə Zaqatala rayon icra hakimiyyəti başçısı Mübariz Əhmədzadə başda olmaqla hüquq-mühafizə orqanlarının rəhbərləri, rayon ziyalıları, Azərbaycan Yazıçılar Birliyinin Şimal-Qərb regional bölməsinin sədri, yazıçı-jurnalist Əlmaniz Ələkbərli və digər media nümayəndələri də iştirak ediblər.
Zaqatala rayonundakı “Heydər Əliyev Mərkəzində” keçirilən tədbirin iştirakçıları əvvəlcə Ümummilli lider Heydər Əliyevin heykəlini ziyarət edib, önünə gül dəstələri qoyaraq, ona öz ehtiramlarını bildiriblər. Daha sonra tədbir “Zaqatala Heydər Əliyev” mərkəzinin zalında davam etdirilib. Əvvəlcə Dövlət himni səsləndirilib, daha sonra Ulu öndər Heydər Əliyev və Şəhidlərimizin ruhu bir dəqiqəlik sükutla yad edilib. Tədbirdə çıxış edən Zaqatala rayon “Təhsil Sektoru”nun müdiri Kəmalə Əhmədova 2022-23 cü tədris ilinin yekunlarına görə yüksək bal toplayan və ali təhsil ocaqlarına qəbul olan məzunlarla görüşə gəldiyi üçün Zaqatala RİH başçısı Mübariz Əhmədzadəyə öz təşəkkürünü bildirib. K. Əhmədova deyib ki, dövlətimiz təhsilə xüsusi diqqət göstərir. Və onun bariz nümunəsi kimi Zaqatala RİH başçısının rayon təhsilinə göstərdiyi diqqət və qayğısını nümunə göstərib, bildirib ki, hər il qəbulun sayı və təhsilin keyfiyyəti biraz da artır.
Daha sonra Zərifə Əliyeva adına liseyin rəhbərliyi, yüksək bal toplayan məzunlardan birinin valideyni də çıxış edərək, dövlətimizin təhsilə göstərdiyi diqqət və qayğıdan danışıblar.
Söz Zaqatala RİH başçısı Mübariz Əhmədzadəyə verilib. Mübariz müəllim bütün sahələrdə olduğu kimi təhsilimizə də, dövlət qayğısının yüksək səviyyədə olduğunu, Prezident İlham Əliyevin və Birinci Vitse-Prezident Mehriban Əliyevanın təhsilimizə xüsusi diqqətlə yanaşdıqlarını vurğulayıb. Mübariz müəllim öz çıxışında məzunların xarici ali təhsil ocaqlarına qəbulunun ilbəil artdığına xüsusi diqqət çəkərək, bunun çox yaxşı hal olduğunu xüsusi vurğulayıb.
Sonra 600-dən artıq bal toplayan məzunları təbrik etmək üçün “Azərbaycan Təhsil İşçiləri Azad Həmkarlar İttifaqı Zaqatala Rayon Komitəsinin” sədri Bəhruz Bayramov, Zaqatala təhsil sektorunun rəhbəri Kəmalə Əhmədova səhnəyə çıxaraq, hədiyyələri məzunlara təqdim etmək üçün Zaqatala RİH başçısı Mübariz Əhmədzadəyə təqdim ediblər. Məzunlara qiymətli hədiyyələr və pul mükafatı verən Zaqatala RİH başçısı Mübariz Əhmədzadə onlara öz tövsiyyələrini verərək, harada olurlarla olsunlar Azərbaycanımıza xidmət etmələrini, Zaqatalalı olduqlarını heç vaxt unutmamalarını və elmin dərinliklərinə vararaq, savadlı kadr kimi yetişmələrini arzulayıb. Rayonda ən yüksək bal toplayan Bəhmətli məktəblisi də, öz növbəsində belə bir görüş üçün Zaqatala RİH başçısına öz minnətdarlığını bildirib.
Daha sonra Zaqatala məktəbliləri arasında ən yüksək bal toplayan məzunlar rayon rəhbəri ilə xatirə şəkili çəkdiriblər.
Diaspor.info
Zaqatala Bölməsi