ZAQATALADA DİŞ XƏSTƏLİKLƏRİNİN AZALMASINA NAİL OLMAQ ÜÇÜN MAARİFLƏNDİRMƏ İŞLƏRİ DAHA ÇOX APARILMALIDIR.
Azərbaycanın bir çox bölgələri vardır ki, havasında rütubət daha çoxdur, bundan əlavə yod çatışmazlığı özünü daha qabarıq göstərir. Belə bölgələrdən biri də, füsünkar təbiəti ilə seçilən, dilbər guşələrimizdən biri olan Zaqatala rayonudur. Bu rayonda da, digər Şimal-qərb rayonları kimi yod çatışmazlığı var. Bu da, bir çox xəstəliklərin, xüsusən də, el arasında adına “Zob” deyilən xəstəliyin və bir çox diş xəstəliklərinin geniş yayılmasına səbəb olur. 
Diş xəstəliklərinin müayinə və müalicəsi ilə yanaşı, müxtəlif gigienik qaydalara əməl olunması ilə bağlı maarifləndirmə işlərinin aparılması da çox vacibdir. Nəzərə alsaq ki, Azərbaycan müstəqillik əldə etdikdən sonra bir çox sahələr kimi stomatologiya sahəsində də, gənc kadrlarımız xarici ölkələrdə təcrübə mübadiləsi edərək, işlədikləri sahəyə yeniliklər gətiriblər, bu ümumi işin xeyrinədir. Ancaq bütün bunlara baxmayaraq, bu sahədə maarifləndirməyə, təbliğata böyük ehtiyac vardır. Xaricdə müxtəlif kurslar keçmiş, qazandığı təcrübələri işlədiyi bölgədə təbliğ edənlərdən biri də, Zaqatala RMX-nin həkim-stomatoloqu Hikmət Əfəndiyevdir. Hikmət Əfəndiyev 2001-2006-cı illərdə Azərbaycan Tibb Universitetinin Stomatologiya fakültəsini bitirib. 2006-2007-ci illərdə təhsilin internatura pilləsini də müvəffəqiyyətlə bitirdikdən sonra 2009-cu ildən Zaqatala RMX-də həkim-stomatoloq kimi əmək fəaliyyətinə başlayıb.
Hikmət Əfəndiyevlə gənc həkim-stomatoloq kimi görüşüb, söhbətləşdik və bölgənin həssas olduğunu nəzərə alaraq stomatoloji sahədə öz fikirlərini bildirməsini ondan xahiş etdik:-“Respublikamızda stomatologiya sahəsi səhiyyəmizin ən proqressiv və inkişaf etmiş sahələrindən biridir. Bu gün ölkəmizdə stomatoloji xidmət üzrə fəaliyyət göstərən Dövlət və özəl klinikalar, ixtisaslaşmış kabinetlər yetərincədir. Zaqatala RMX-nin stomatoloji kabineti də, inkişaf etmiş tibb müəssisələrindəndir desək, yanılmarıq. Belə ki, fəaliyyətdə olan yerli mütəxəssislərimiz dünyada tətbiq edilən yeni üsul və vasitələrdən, yüksək texnoloji imkanlardan yetərincə yararlana bilirlər. Mən də gənc həkim-stomatoloq kimi iştirak etdiyim xarici ölkələrdə ilk dəfə nümayiş etdirilən yenilikləri, işlədiyim müəssisədə maksimum tətbiq etməyə çalışıram. Çalışıram ki, dəvət olunduğum təlimlərdə mütləq iştirak edim və qarşılıqlı təcrübə mübadiləsindən yararlanım. Düşünürəm ki, həkim-stomatoloq kimi vəzifəm təkcə ağız boşluğunun sağlamlığını qorumaqla və dişlərin müayinə və müalicəsi, həm də bərpası ilə bitməməlidir. 
Bundan əlavə bir gənc həkim kimi zonamızda yod çatışmazlığını nəzərə alaraq, diş xəstəliklərinin geniş yayılmasını diqqətdə saxlamağı, pasiyentlər arasında mütəmadi maarifləndirmə işləri aparmağı da özümə borc bilirəm. Bütün bu kimi xidmətlərim, işlədiyim sahədə yeniliklərin tətbiqinə görə rəhbərliyimiz tərəfindən dəfələrlə mükafatlandırılmışam. Bu təltiflərdən sonra həvəslənməklə yanaşı, məsuliyyətim də birə-beş qat artıb.”
Hikmət Əfəndiyev kimi gənc həkimlərimizin bölgələrdə, rayon mərkəzlərində böyük həvəslə işləməsi və öz sahələrində dünyadakı ən son yenilikləri belə əyalətlərdə tətbiq etmələri təqdirəlayiqdir.
Sadiq ƏLƏKBƏRLİ.
Müxbir.
