ZAQATALA RAYON YUXARI TALA KƏND 4 SAYLI TAM ORTA MƏKTƏBİNDƏ ŞƏHİD LEYTENANT SƏRXAN ÖMƏROVUN AİLƏSİNƏ "ŞANLI TARİX YAZANLAR" KİTABI TƏQDİM OLUNUB.
Zaqatala rayon Yuxarı Tala kənd 4 saylı tam orta məktəbində bununla bağlı tədbir təşkil olunub. Diaspor.info saytının Şimal-qərb bürosunun verdiyi məlumata görə sözügedən tədbiri təhsil ocağının rəhbəri Almaz Abdurrahmanova açıb. Direktor əvvəlcə şəhidlərimizin ruhunu yad etmək üçün bir dəqiqəlik sükut elan edib. Daha sonra Almaz xanım məktəbin sevimli şagirdi olmuş Sərxan Mübariz oğlu Ömərov haqqında danışıb:- Sərxan təkcə bizim məktəbimizin deyil, bütün el-obamızın fəxridir. Onun haqqında nə qədər danışsaq da yenə də azdır. Sərxan çox tərbiyəli şagird olub, hətta hərbi akademiyada oxuyanda belə öz tərbiyəsi ilə seçilən bir kursant olub. Bizim vətənpərvər şagirdimiz olub. Mən onun valideynləri, bacılarını da yaxşı tanıyıram. Balaca bacısı məktəbimizin şagirdidir. Bu ailə çox hörmətli və vətənpərvər ailədir. Burada onun iptidai sinif müəllimi, sinif rəhbəri və tarix müəllimi də iştirak edirlər.
İptidai sinif müəllimi Sərxanın adını çəkən kimi onu qəhər basdı. Bir neçə dəfə cəhd etsə də, göz yaşları ona imkan vermədi ki, öz fikirlərini sərbəst desin. Sinif rəhbəri və Tarix müəllimi Sərxan haqqında danışarkən onun uşaqlıqdan hərbiyə meyilli olduğunu və uşaqlıqdan vətənpərvər şagird olduğunu xüsusi vurğuladılar.
Daha sonra söz Zaqatala şəhidləri, "Şanlı Tarix Yazanlar" kitabının müəllifi Yazıçı - Jurnalist Əlmaniz Ələkbərliyə verildi. Əlmaniz müəllim 233 Zaqatala şəhidləri haqqında geniş məlumatları özündə əks etdirən bu kitabda XTQ zabiti olmuş Sərxan Mübariz oğlu Ömərov haqqında da ətraflı məlumatın olduğunu dedi:- Sərxan bu məktəbin yetirməsidir. Qəhrəman axtarmaq üçün uzağa getməyə ehtiyac yoxdur, əsl qəhrəmanı bu məktəb özü yetişdirib.
XTQ Şəhidi leytenant Sərxan Mübariz oğlu Ömərov İkinci Qarabağ savaşında iştirak edərək adını Şanlı Tarix Yazanların siyahısına yazdıra bilmişdir. Ancaq 13-sentyabr 2022-ci ildə ermənilər yenidən Azərbaycan sərhədində təxribat törətmək istədilər. Bu zaman Sərxan Ömərov kimi qəhrəmanlarımız öz şirin canlarına qıyaraq ermənilərin dərsini verdilər və bir daha Azərbaycan ordusunun qüdrətini onlara göstərdilər.
Daha sonra şəhidimizin ailəsi adından bacısı Bağdad Ömərova danışdı. Bağdad qardaşının bir qəhrəman olmasından fəxr etdiyini və qürur duyduğunu söyləyib. Bacısı neçə ki, bu dünyada yaşayır qardaşının adını uca tutacağını və onun adını yaşadacağını xüsusi vurğulayıb.
Tədbirin sonunda Şanlı Tarix Yazanlar kitabının müəllifi avtoqraf yazaraq kitabı şəhidin atası Mübariz Ömərova hədiyyə edib.
Diaspor.info
Zaqatala.
1 374
