ZAQATALA RAYONU ÜÇÜNCÜ TALA KƏND TAM ORTA MƏKTƏBİNDƏ ŞƏHİD ORXAN CUMAYEVƏ HƏSR EDİLMİŞ TƏDBİR KEÇİRİLİB.

Zaqatala rayonu A. Qurbanov adına Üçüncü Tala kənd tam orta məktəbinin 6-b sinif şagirdləri Şəhid Orxan Cumayevə həsr olunmuş " Dastana dönən şərəfli ömür" adlı tədbir hazırlamışdılar. Tədbirdə şəhidin anası Rahilə ana və bacısı Fatma xanımla yanaşı şəhid Elvin Məmmədovun anası Tahirə ana da iştirak edirdi. Bundan əlavə Şəhid Orxan Cumayev haqqında,"DASTANA DÖNƏN ŞƏRƏFLİ ÖMÜR" kitabının müəllifi Əlmaniz Ələkbərli də qonaq qismində iştirak edib.

Tədbirdə əvvəlcə Dövlət himni səsləndirildi, daha sonra isə şəhidlərimizin ruhunu bir dəqiqəlik sükutla yad edildi.
Təhsil ocağının rəhbəri Alimə Qurbanova ilk çıxış edənlərdən oldu. Direktor şəhidlərimizə olan Dövlət qayğısından geniş danışaraq, məktəbdə vətənpərvərlik ruhunun yüksək səviyyədə olmasını xüsusi vurğuladı. Alimə xanım altıncı sinif şagirdlərinin hazırladığı tədbirin onların gələcəkdə bir şəxsiyyət kimi formalaşmasında böyük rol oynayacağı haqqında da danışdı.

Daha sonra altıncıların sinif rəhbəri Elza Bəşirova sözü öz şagirdlərinə verdi.
Şəhid analarını məktəbin foyesində əllərində bayraqlarla qarşılayan altıncılar şəhidlərimiz haqqında şer deyib, mahnılar oxudular.
Sinif rəhbərinin Orxan Cumayev haqqında hazırladığı videolent də tədbir iştirakçılarına göstərilib.

Sonra Elza xanım sözü Orxan Cumayevin anası Rahilə anaya verdi. Rahilə xanım şəhid oğlunun şərəfinə hazırlanan tədbirə görə təhsil ocağının rəhbəri başda olmaqla bu tədbir üçün əziyyəti keçən hər bir müəllim və şagirdlərə minnətdarlığını bildirdi. Onun üçün Şəhid oğlu haqqında çətin olsa da bir neçə kəlmə danışdı. Və Şəhid Orxan Cumayevin adını daşıyan sinifə onun böyük portretini hədiyyə etdi.

Daha sonra Elza müəllimə sözü digər Şəhid anası Tahirə anaya verdi. Tahirə xanım da təşkil olunan bu tədbir üçün hər bir məktəbliyə, müəllimlər və rəhbərliyə xüsusi təşəkkürünü bildirdi.
Sinif rəhbəri Elza Bəşirova şəhid analarına üzünü tutaraq:- biz Sizin üçün nə etsək də, yenə də haqqınız ödənməz, dedi.
Daha sonra Elza müəllimə sözü yazıçı - jurnalist Əlmaniz Ələkbərliyə verdi. Əlmaniz müəllim də öz növbəsində tədbirə dəvət olunduğu üçün məktəb rəhbərliyinə təşəkkür etdi.

Əlmaniz müəllim şəhid Orxan Cumayev haqqında geniş danışdı və onun komandiri ilə olan kiçik söhbəti də tədbir iştirakçılarına çatdırdı:- Orxanın komandiri Ayaz müəllimlə telefon əlaqəsi saxladıq, mənə dedi ki, Orxan Cumayev yaralanmışdı. İki həftə hərbi hospitalda müalicə aldı. Tam sağalmamış gəlmişdi yanımıza və mən ona açıq döyüşlərdə iştirak etməyi qadağan etdim. Dedim ki, sən tam sağalmamış niyə gəlmisən? Orxan məndən sonra digər komandirə yaxınlaşıb ərizə yazıb ki, mən hökmən açıq döyüşlərdə iştirak etməliyəm, Murov dağında, çünki orada mənim dostlarım var. Orxan açıq döyüşlərdə iştirak edərək məhz həmin gün də şəhid oldu. Bəli bu qəhrəmanlıqdır.

Daha sonra şəhid anaları ilə altıncılar xatirə şəkilləri çəkdirildilər.

Diaspor info
Zaqatala bürosu