Dövlət Komitəsində “Azərbaycan Qızılbaşları” sənədli filminin təqdimatı olub
Diasporla İş üzrə Dövlət Komitəsində “Azərbaycan Qızılbaşları” adlı sənədli filmin təqdimat mərasimi keçirilib.
Tədbiri giriş sözü ilə açan Diasporla İş üzrə Dövlət Komitəsi sədrinin müavini Elşad Əliyev Komitənin dəstəyi ilə 2023-cü ilin noyabrında dünyanın müxtəlif ölkələrindən dəvət olunmuş qızılbaşların iştirakı ilə beynəlxalq elmi konfransın keçirildiyini, eləcə də ötən ilin yayında Naxçıvanda keçirilən Diaspor Gənclərinin IV Yay düşərgəsində Əfqanıstanda yaşayan qızılbaşların gənc nümayəndəsinin iştirak etdiyini qonaqların nəzərinə çatdırıb.
Daha sonra filmin ssenari müəllifi Ruslan Süleymanov çıxış edib və Əfqanıstanda iki milyon Azərbaycan türkünün yaşadığını diqqətə çatdırıb, sənədli filmin çəkiliş prosesləri barədə məlumat verib. O, göstərilən dəstəyə görə Diasporla İş üzrə Dövlət Komitəsinə təşəkkürünü bildirib.
Çıxışlardan sonra sənədli film nümayiş olunub.
Əfqanıstanda yaşayan qızılbaşların öz dillərini, mədəniyyətlərini qoruyub saxlamaları, yaşadıqları ölkədə Azərbaycanın dilinin, mədəniyyətinin təbliğ olunması üçün göstərdikləri səylər ekran əsərinin əsas süjet xəttini təşkil edir. Filmdə Əfqanıstanda yaşayan qızılbaşlar doğma ana dillərində təhsil almaq istəklərini dilə gətiriblər. Diasporla İş üzrə Dövlət Komitəsinin sədri Fuad Muradov filmdəki müsahibəsində Qızılbaş irsinin təbliği məqsədilə Komitənin gördüyü işlərdən və qızılbaşlarla olan əməkdaşlıqdan danışıb. Bundan başqa tarix üzrə fəlsəfə doktorları Mübariz Ağalarlının, Fərəh Hüseynin, Əfqanıstanda yaşayan qızılbaşların nümayəndələrinin, bir sıra xarici alim və tarixçilərin fikirləri də filmdə yer alıb.
Qeyd edək ki, 2023-cü ilin noyabrında Azərbaycan Diasporuna Dəstək Fondunun və “Qızılbaş” Qlobal İrsi Şurası Təşkilatının birgə dəstəyi ilə Diasporla İş üzrə Dövlət Komitəsində “Azərbaycanda Qızılbaş İrsi: tarixin izi ilə“ mövzusunda beynəlxalq konfrans keçirilib. Konfransda “Qızılbaş” Qlobal İrs Şurasının Pakistan, Türkiyə, ABŞ, Kanada, Birləşmiş Krallıq, Sinqapur və Əfqanıstan üzrə təmsilçiləri, Milli Məclisin deputatları, Qızılbaş irsinin Azərbaycan və Türkiyədən olan tədqiqatçıları, müxtəlif dövlət qurumlarının, qeyri-hökumət təşkilatlarının və beynəlxalq təşkilatların nümayəndələri iştirak ediblər. 
